Hesablama Palatası: Sosial sığorta borclarının artması nəzarətin gücləndirilməsini tələb edir
2025-ci ilin 1 yanvar tarixinə Dövlət Sosial Müdafiə Fondunun debitor borcları 264,6 milyon manat təşkil edib. İlin birinci yarısının sonuna – 1 iyul 2025-ci il tarixinə isə bu göstərici 285,2 milyon manata yüksəlib.
Crossmedia.az xəbər verir ki, bu Dövlət Sosial Müdafiə Fondunun 2026-cı il üçün büdcə layihəsinə Azərbaycan Respublikası Hesablama Palatasının rəyində öz əksini tapıb.
Rəydə qeyd edilib ki, Hesablama Palatası əvvəlki illə müqayisədə cari ilin I yarımillik dövrünün sonuna debitor borcların artım davranışlarına təsir göstərmiş əsas iri sığortaedənlər və digər hüquqi şəxslər üzərində inzibati nəzarətin gücləndirilməsi və debitor borcların minimallaşdırılmasını təmin edəcək optimal həll yollarının işlənib hazırlanmasının zəruriliyi qənaətindədir.
Cari ilin 1 yanvar vəziyyətinə qeydə alınmış debitor borc tərkib etibarilə 194,23 mln. manat (73,4%) əsas borc, 70,19 mln. manat (26,5%) hesablanmış faiz və maliyyə sanksiyaları üzrə yaranmış borc, 0,16 mln. manat isə (0,1%) digər borcdan ibarətdir. Nəzərə alsaq ki, cari ilin 1 iyul vəziyyətinə müvafiq göstəricilər 210,58 mln. manat (73,8%), 74,42 mln. manat (26,1%) və 0,16 mln. manat (0,1%) təşkil edib.
Debitor borc məcburi dövlət sosial sığorta haqqının müəyyən edilmiş müddətdə ödənilməməsi əsasında formalaşan borcdur ki, bu da sonda “Sosial sığorta haqqında” Azərbaycan Respublikasının Qanununa müvafiq olaraq vergi orqanı tərəfindən həmin sığortaedənə faiz və maliyyə sanksiyasının tətbiqi ilə nəticələnir.
14:25 12.11.2025
Oxunuş sayı: 1622
