AMB: Azərbaycanda KOB-ların əlavə dəyər yaratmaq potensialı aşağıdır
Azərbaycanda mikro, kiçik və orta sahibkarlıq subyektlərinin (KOB və ya MSME – micro, small and medium-sized enterprises) əlavə dəyər yaratmaq qabiliyyəti nisbətən aşağıdır.
Crossmedia.az xəbər verir ki, bunu Azərbaycan Mərkəzi Bankının Maliyyə sektorunun dayanıqlı inkişafı departamentinin direktoru Rüstəm Tahirov Bakıda keçirilən “Asia SME Monitor 2025” seminarında çıxışı zamanı bildirib.
Onun sözlərinə görə, KOB sektoru ölkədə ümumi məşğulluğun təxminən yarısını təmin etsə də, bu sahədə məhsuldarlıq göstəriciləri aşağı səviyyədədir. Bu isə məşğulluğun əsasən aşağı əlavə dəyər yaradan fəaliyyət sahələrində cəmlənməsi ilə əlaqədardır.
R.Tahirov qeyd edib ki, Azərbaycan maliyyə sistemi əsasən bank sektorunda cəmlənib və banklar real iqtisadiyyata kredit axınında həlledici rol oynayır. Hazırda MSME kreditləri bankların ümumi kredit portfelinin 20 faizini, ümumi biznes kreditlərinin isə 47 faizini təşkil edir.
Mərkəzi Bank rəsmisi vurğulayıb ki, bu struktur bir tərəfdən bankların iqtisadi fəallığa artan töhfəsini göstərsə də, digər tərəfdən kredit dövrlərində KOB-ların təminat və likvidlik çətinlikləri ilə üzləşə biləcəyini göstərir.
O əlavə edib ki, bankların KOB risklərini qiymətləndirmə və idarəetmə imkanlarının gücləndirilməsi, eləcə də maliyyə mənbələrinin bank sektorundan kənara – kapital bazarları və qeyri-bank institutlarına doğru şaxələndirilməsi Mərkəzi Bankın əsas siyasət istiqamətlərindəndir.
14:23 12.11.2025
Oxunuş sayı: 1438
