İKT sektorunda mühüm irəliləmə: Növbəti mərhələdə əsas məqsəd ...
Bu ilin yanvar-sentyabr
aylarında Azərbaycanda informasiya və kommunikasiya texnologiyaları (İKT)
sektorunda 1 milyard 749 milyonmanatlıq məhsul istehsal
edilib.
Dövıət Statistika Komitəsi
bildirib ki, bu, ötən ilin eyni dövrü ilə müqayisədə 6,7 %
çoxdur.
Təkcə sentyabrda isə bu
sektorda 420 milyon manatlıq məhsul istehsal olunub ki, bu
da 1 il əvvələ nisbətən 2 dəfə çoxdur.
Bu ilin ilk 9 ayında sektorun
Ümumi Daxili Məhsulda (ÜDM) payı 1,8 % təşkil edib.
Xatırladaq ki, hesabat dövründə Azərbaycanda 95 milyard 229,2 milyonmanatlıq və yaxud illik müqayisədə 1,3 % çox ÜDM istehsal olunub.
Sözügedən nəticələri Crossmedia.az-a şərh edən İnformasiya Kommunikasiya Texnologiyaları üzrə mütəxəssis Vüsal Məmmədzadə bildirib ki, bu göstəricilər Azərbaycanın rəqəmsal iqtisadiyyatının dinamik və gələcəyə hesablanmış inkişaf trayektoriyasını təsdiqləyir: “Sektorun 6,7 % artım tempi ilə milli iqtisadiyyatın orta artım tempini (1,3 %) xeyli qabaqlaması, İKT-nin qeyri-neft sektorunda inkişafın əsas drayveri rolunu öz üzərinə götürdüyünü təsdiqləyir. Bu, makroiqtisadi baxımdan iqtisadiyyatın şaxələndirilməsi məqsədlərinə xidmət edən, dayanıqlı inkişaf üçün vacib bir tendensiyadır".
Ekspertin sözlərinə görə, xüsusilə sentyabr ayında istehsalın iki dəfə artaraq 420 milyon manata çatması faktı sektorun kəskin potensialının mövcudluğuna dair ən parlaq sübutdur: “İstehsalın 420 milyon manata çatması faktı təsadüfi deyil. Bu sıçrayış dövlət səviyyəsində həyata keçirilən "Ağıllı Kənd" və "Ağıllı Şəhər" layihələri, eləcə də rəqəmsal infrastrukturun yenilənməsi kimi proqramlarla sıx bağlıdır. Paralel olaraq özəl sektorda innovativ məhsul və xidmətlərə tələbatın artması da bu inkişafı stimullaşdırır".
Bununla belə, V.Məmmədzadə hesab edir ki, sektorun ÜDM-də cəmi 1,8 %-lik payı Azərbaycanın hələ də inkişaf etmiş rəqəmsal iqtisadiyyat səviyyəsindən uzaq olduğunu göstərir: “Bütün bu uğurlara baxmayaraq, İKT-nin payının artırılması prioritet olaraq qalmalıdır. Növbəti mərhələdə əsas məqsəd bu göstəricini 5 % və daha yuxarı səviyyəyə qaldırmaq olmalıdır. Bunun üçün yalnız telekommunikasiya və internet xidmətlərinin deyil, həm də yüksək əlavə dəyər yaradan proqram təminatı (software) və texnoloji məhsul (hardware) istehsalı genişləndirilməlidir".
Ekspert, həmçinin qeyd edib ki, İKT-nin ixrac potensialının artırılması da iqtisadiyyatın diversifikasiyasına mühüm töhfə verə bilər: “Azərbaycan artıq regionda rəqəmsal texnologiyalar mərkəzinə çevrilmək üçün zəruri infrastruktur bazasına malikdir. Növbəti mərhələdə məqsəd İKT xidmətlərinin xarici bazarlara ixracını genişləndirmək və rəqəmsal məhsulun milli brendini formalaşdırmaq olmalıdır".
Fatimə Hacıəliyeva
11:45 17.10.2025
Oxunuş sayı: 7903
