“Bərpaolunan enerji növlərindən istifadənin artması neft və qazdan asılılığı azalda bilər”- RƏY
Azərbaycan Prezidenti İlham Əliyev BMT Baş Assambleyasının 80-ci sessiyasında bildirib ki, ölkə Günəş, külək və su elektrik enerjisi kimi bərpaolunan mənbələrə böyük sərmayələr yatırır. Onun sözlərinə görə, 2030-cu ilə qədər enerji istehsalının təxminən 40 faizi məhz bu mənbələr hesabına təmin ediləcək.
Azərbaycanın
bərpaolunan enerjiyə yönəlməsi həm enerji təhlükəsizliyi, həm də ekologiya
baxımından mühüm addımdır. Bu hədəf ölkəni neft-qaz asılılığından qismən azad
edə və regionda yaşıl enerji mərkəzinə çevirə bilər. Lakin planların uğuru sərmayələrin
davamlılığı və texnoloji tərəfdaşlıqlardan asılı olacaq.
Tanınmış
ictimai – siyasi xadim Vahid Əhmədov dövlət başçısının səsləndirdiyi fikirlər
barədə Crossmedia.az-a danışıb.
O, bərpaolunan
enerji növlərindən istifadənin artmasının Azərbaycanın ixrac potensialını gücləndirdiyini
bildirib: “Azərbaycanda, ümumiyyətlə, alternativ enerji kimi bərpaolunan enerji
növlərindən istifadə sahəsində uzun müddətdir ki, böyük işlər görülür, geniş
proqramlar təsdiq olunub. Bir neçə yerdə, məsələn, Ərəbistanda və Kanadada bu
istiqamətdə əməliyyatlar həyata keçirilib və stansiyalar işə salınıb. Həmçinin Sumqayıtda
günəş panellərinin istehsalı ilə bağlı zavod istifadəyə verilib. Bundan əlavə,
işğaldan azad olunmuş ərazilərdə su elektrik stansiyalarının tikilməsi və
istifadəyə verilməsi ilə bağlı da geniş işlər görülüb. Azərbaycan Prezidenti
BMT Baş Assambleyasının sessiyasında qeyd etdiyi kimi, ölkə artıq bir neçə
ildir ki, günəş, külək və su elektrik enerjisindən istifadə etməyə başlayıb və
bu sahədə kifayət qədər səmərə əldə olunub”.
Müsahibimizin
sözlərinə görə, Azərbaycanın bu sahədə nailiyyətləri artmaqda davam edir: “Amma
Azərbaycan neft-qaz istehsal edən ölkə olaraq qalır və dövlət büdcəsinin gəlirlərinin
təxminən 75 faizi bu sahələrdən formalaşır. Neft-qaz hasilatı uzun illərdir ölkədə
mövcud ehtiyatlar hesabına davam edir. Bununla yanaşı, alternativ enerji kimi bərpaolunan
enerji mənbələrinin istifadəsi böyük bir proqram olaraq gündəmdədir və hazırda
bütün dünyada bu istiqamətdə geniş işlər görülür. Bu sahəyə diqqət
artırılmalıdır. Çünki bərpaolunan enerji növlərindən istifadənin artması neft və
qazdan asılılığı azalda bilər və onların daha çox ixracına şərait yarada bilər.
Bu isə Azərbaycanın ixrac potensialını artıran mühüm amillərdən biridir”.
Nicat
Rüstəmzadə
22:58 26.09.2025
Oxunuş sayı: 4980
