İdxal həcminə görə Azərbaycanın aparıcı tərəfdaşlarının beşliyi açıqlandı
2025-ci ilin yanvar-avqust aylarında Azərbaycan aparıcı ticarət tərəfdaşları ilə fəal əməkdaşlığı davam etdirib, beş ölkədən idxal həcmini artırıb, bu sırada lider mövqedə Çindir - səkkiz ay ərzində bu ölkədən təxminən 2,88 milyard dollar dəyərində mal idxal olunub.
Crossmedia.az Dövlət Gömrük Komitəsinə istinadən xəbər verir ki, idxal həcminə görə ikinci yerdə 2,53 milyard dollar göstərici ilə Rusiya qərarlaşıb.
Türkiyə 1,55 milyard dollar dəyərində mal ixrac etməklə üçüncü yerdədir. Dördüncü yeri ABŞ tutur - 754 milyon dollar həcmində mal idxal olunub . Beşinci pillədə isə Azərbaycana 688 milyon dollar dəyərində mal ixrac etmiş Böyük Britaniya qərarlaşıb.
Ötən ilin eyni dövrü ilə müqayisədə bu ölkələrin hamısından idxal artıb. Belə ki, Çindən idxal 603,4 milyon dollar artaraq 26,5% yüksəlib. Rusiya ixracı 347,1 milyon dollar (15,9%), Türkiyə isə 46,8 milyon dollar (3%) artırıb. ABŞ və Böyük Britaniya da əhəmiyyətli artım nümayiş etdiriblər – müvafiq olaraq 101 milyon və 510,2 milyon dollar. Xüsusilə Böyük Britaniyadan idxal nəzərəçarpacaq dərəcədə artaraq ötən illə müqayisədə təxminən dörd dəfə yüksəlib.
Qeyd edək ki, Azərbaycan Dövlət Gömrük Komitəsinin hesablamalarına əsasən, cari ilin yanvar-avqust aylarında Azərbaycan 173 ölkə ilə 32,118 milyard ABŞ dolları məbləğində ticarət əməliyyatları həyata keçirib.
Ticarət dövriyyəsi ixrac üzrə 15,2 milyard ABŞ dolları, idxal üzrə isə 13,6 milyard ABŞ dolları təşkil edib. Beləliklə, illik ifadədə ixrac 5,4% azalıb, idxal isə 26,1% artıb.
Nəticədə xarici ticarət üzrə 1,6 milyard dollar həcmində müsbət saldo formalaşıb ki, bu da ötən illə müqayisədə 3,3 dəfə azdır.
17:27 16.09.2025
Oxunuş sayı: 680
