Azərbaycan “Regional Kibertəhlükəsizlik Həftəsi 2025”də təmsil olunub
Mərakeş Krallığının Rabat şəhərində “Regional Kibertəhlükəsizlik Həftəsi 2025” keçirilir.
Crossmedia.az Xüsusi Rabitə və İnformasiya Təhlükəsziliyi Dövlət Xidmətinə istinadən xəbər verir ki, “Dayanıqlı İqtisadi İnkişaf üçün Rəqəmsal Suverenlik” mövzusuna həsr edilən tədbir Regional Rabitə Birliyi (RCC) tərəfindən təşkil edilir, Mərakeşdə İnformasiya Sistemlərinin Təhlükəsizliyi Baş İdarəsinin (DGSSI) tərəfdaşlığı, Beynəlxalq Telekommunikasiya İttifaqı (ITU), OIC-CERT və FIRST təşkilatları ilə əməkdaşlıq çərçivəsində, sentyabr 15–19-u tarixlərində həyata keçirilir.
Tədbirin əsas məqsədi kibertəhlükəsizlik sahəsində regional əməkdaşlığın gücləndirilməsi, kritik infrastrukturun mühafizəsi və rəqəmsal suverenlik prinsipləri əsasında davamlı iqtisadi inkişafın təmin olunmasıdır.
Tədbirdə Xüsusi Rabitə və İnformasiya Təhlükəsizliyi Dövlət Xidmətininin baş idarə rəisinin müavini və OİC-CERT İdarə heyətinin üzvü Tural Məmmədov “İƏT məkanında kritik infrastruktur kibertəhlükəsizliyinin əməkdaşlıq yolu ilə gücləndirilməsi” mövzusunda panel müzakirəsində çıxış edib. O, ölkəmizin kritik informasiya infrastrukturlarının qorunması istiqamətində görülən işlər, dövlət və özəl sektor arasında tərəfdaşlığın inkişafı, risk qiymətləndirilməsi, həyata keçirilən auditlər və kibertəhlükələrin qarşısının alınmasında əldə edilmiş qabaqcıl təcrübələrdən ətraflı məlumat verib. T.Məmmədov NATO-nun dəstəyi və Rumıniya İCU tərəfdaşlığı ilə həyata keçirilən “Kiber Poligon” layihəsindən bəhs edərək, informasiya təhlükəsizliyinin təmin olunmasında beynəlxalq əməkdaşlığın rolunu vurğulayıb.
Qeyd olunub ki, tədbir çərçivəsində müxtəlif ölkələrin kibertəhlükəsizlik mərkəzləri ilə ikitərəfli görüşlər təşkil edilib, beynəlxalq əməkdaşlığın gücləndirilməsi, qabaqcıl təcrübələrin paylaşılması və gələcək planlar müzakirə edilib.
Görüşlər zamanı XRİTDX-nin təşkilatçılığı ilə cari ilin oktyabr ayında keçiriləcək “CIDC-2025” tədbiri barədə ətraflı məlumat verilib. Azərbaycanın sahə üzrə təcrübəsini öyrənmək istəyən bir sıra ölkələrin tədbir çərçivəsində keçiriləcək “Ağıllı Şəhərlərdə Kibermüharibə” yarışında öz komandaları ilə iştirakı razılaşdırılıb.
17:11 16.09.2025
Oxunuş sayı: 689
