Birinci yarımildə Azərbaycanın ABŞ ilə ticarət dövriyyəsi 60% artıb
Bu ilin yanvar-iyun aylarında Azərbaycanla ABŞ arasında ticarət dövriyyəsi ötən ilin eyni dövrü ilə müqayisədə 60% artıb.
Crossmedia.az xəbər verir ki, bunu Nazirlər Kabinetində keçirilən Prezident İlham Əliyevin Vaşinqton səfərinə həsr olunmuş xüsusi iclasda iqtisadiyyat naziri Mikayıl Cabbarov deyib.
Nazir qeyd edib ki, Azərbaycan-ABŞ iqtisadi əlaqələrinin müqavilə-hüquq bazasını ötən dövrdə imzalanmış 87 sənəd təşkil edir:
"2007-ci ildə iki ölkə arasında əməkdaşlığın institusional mexanizmi kimi Azərbaycan-ABŞ İqtisadi Tərəfdaşlıq Komissiyası yaradılıb. Komissiyanın sonuncu (4-cü) iclası 2019-cu il mayın 17-də Bakıda keçirilib. Azərbaycan-ABŞ ticarət əməkdaşlığı son illərdə yüksələn xətlə inkişaf edib. Belə ki, 2024-cü ildə ticarət dövriyyəsinin həcmi 1.7 milyard, o cümlədən idxalın həcmi 1.6 milyard, ixracın həcmi 135 milyon ABŞ dolları təşkil edib, 2023-cü illə müqayisədə, 2024-cü ildə ticarət dövriyyəsi 94% artıb. Bu dövrdə ABŞ Azərbaycanın xarici ticarət dövriyyəsində 5-ci, o cümlədən idxalda 4-cü, ixracda isə 24-cü yeri tutub".
Qeyd edək ki, Dövlət Gömrük Komitəsinin məlumatlarına əsasən, bu ilin birinci rübündə Azərbaycanla ABŞ arasında ticarət dövriyyəsi 593 milyon 703 min ABŞ dolları həcmində olub. Bunun 38 milyon 63,2 min ABŞ dolları ixrac, 555 milyon 640 min ABŞ dolları isə idxal əməliyyatlarının payına düşüb.
16:56 26.08.2025
Oxunuş sayı: 4261
