Ölkədə maşın əlindən "iynə yerə düşmür": Bu mənzərə iqtisadiyyata necə təsir edir?
Dövlət Gömrük Komitəsindən bildirilib ki, bu ilin yanvar-iyul aylarında Azərbaycan 1 milyard 171 milyon ABŞ dolları dəyərində 63 401 ədəd müxtəlif təyinatlı avtomobil idxal edib.
Bu, ötən ilin eyni dövrü ilə müqayisədə müvafiq olaraq 24,1 % çox və 23,9 % çoxdur.
İl ərzində sürücü daxil olmaqla 10 nəfər və yaxud daha çox adam daşımaq üçün nəzərdə tutulmuş motorlu nəqliyyat vasitələrinin idxalı 2,35 dəfə artaraq 305 ədəd (20,253 milyon ABŞ dolları dəyərində), əsasən adamların daşınması üçün nəzərdə tutulmuş minik avtomobilləri və digər motorlu nəqliyyat vasitələrinin idxalı isə 26,1 % artaraq 58 044 ədəd (1 milyard 60,459 milyon ABŞ dolları dəyərində) təşkil edib.
Bu avtomobillərin 29 958-i (601,25 milyon ABŞ dolları dəyərində) daxili yanma mühərriklə yanaşı, elektrik mühərriklə də hərəkətə gətirilən nəqliyyat vasitələri, 1 180-i (38,13 milyon ABŞ dolları dəyərində) isə yalnız elektrik mühərriklə hərəkətə gətirilən nəqliyyat vasitələridir.
Bu isə birincinin 2,3 dəfə artması, ikincinin isə 34,15 % azalması deməkdir.
Bundan əlavə, yük daşımaq üçün mühərrikli nəqliyyat vasitələrinin idxalı 0,5 % azalaraq 4 759 ədəd (57,146 milyon ABŞ dolları dəyərində), xüsusi təyinatlı motorlu nəqliyyat vasitələrinin idxalı isə 17,2 % artaraq 293 ədəd (28,133 milyon ABŞ dolları dəyərində) olub.
Aydındır ki, ölkədə avtomobillərin sayı getdikcə artır. Əslində bunun üçün statistikaya ehtiyac yoxdur. Elektromobillərin sayında artım müşahidə olunması da təsadüfi deyil. Avtomobillərin artması ilə tıxac problemi də öz aktuallığını qoruyur, bir az mübaliğə ilə desək, şəhərdə iynə atsaq yerə dəymir.
Bəs heç olmasa, bu artəm iqtisadiyyatın inkişafına töhfə verirmi?
Bu barədə iqtisadçı Fuad İbrahimov Crossmedia.az-a açıqlama verib: “Ölkəyə gətirilən avtomobillərə xüsusi texnikalar da daxildir. Azərbaycanda istehsalı olmayan, kənd təsərrüfatında və inşaat sektorunda istifadə oluna biləcək texnikalar iqtisadiyyata müəyyən dərəcədə müsbət təsir göstərə bilər. Bu gün gətirilən avtomobillərə tələbat var. Aydın məsələdir ki, təlabat olmasa, idxal da olmaz. Həmçinin gələn avtomobillərin ehtiyat hissələrinin və ya ən kiçik detalının belə istehsalını təşkil edərək iqtisadiyyatda irəliləyiş əldə edə bilərik. Yaxud digər sənaye üsulu ilə istehsal prosesinə kömək edə bilsək iqtisadi sahədə müəyyən irəliləyiş əldə edə bilərik deyə düşünürəm”.
Ayhan
13:34 19.08.2025
Oxunuş sayı: 5093
