"Neftin qiyməti həm istehsalçılar, həm də alıcılar üçün uyğundur" -RƏY
OPEC 2025-ci ildə qlobal neft tələbatını ötən ayın səviyyəsində – gündə 1,3 milyon barel həcmində saxlayıb. İllik hesablamada tələbat 105 milyon barel/gün təşkil edəcək. 2026-cı ildə isə tələbatın gündəlik 1,4 milyon barel artacağı proqnozlaşdırılır ki, bu da sutkada 107 milyon barel səviyyəsinə çatacaq. Artım əsasən Hindistanın payına düşəcək, həmçinin Avropa, Amerika, Yaxın Şərq və Afrika ölkələrində iqtisadi artım gözləntilərinin yaxşılaşması ilə əlaqələndirilir.
Mövzu ilə bağlı Crossmedia.az-a açıqlama verən Neft Araşdırmaları Mərkəzinin rəhbəri İlham Şaban bildirib ki, bu, məntiqli proqnozdur: “Əgər hazırda gündəlik dünyada təxminən 103 milyon bareldən bir qədər artıq neft hasil edilir. İkinci tərəfdən, ildən-ilə tələbat böyük olmayan, lakin davamlı şəkildə artır. Bunun əsas səbəbi inkişaf etməkdə olan ölkələrdə, yəni üçüncü dünya ölkələrində enerjiyə tələbatın yüksəlməsidir. İnkişaf etmiş ölkələrdə isə yaşıl enerji və qənaətcil texnologiyalara üstünlük verildiyindən, orada tələbat artımı demək olar ki, nəzərə çarpmır".
O, həmçinin hazırkı qiymətlərin həm istehsalçılar, həm də alıcılar üçün uyğun olduğunu qeyd edib: “Avqustun 1-də London birjasında Brent markalı neftin qiyməti təxminən 69 dollar idi. Bugün isə qiymət 66 dollar civarındadır. Bu, həm istehsalçılar, həm də alıcılar üçün komfortlu diapazondur. İstehsalçılar bu qiymətə kifayət qədər gəlir əldə edə bilir, investisiyaları maliyyələşdirə bilir, alıcılar üçün də bu normal səviyyədir. Bazarda hazırda bolluq var; qiymətlər nə yüksək, nə də aşağıdır. Faktiki olaraq aprel ayından bu yana neft 65–70 dollar aralığında ticarət olunur. Bu isə bazar iştirakçıları üçün proqnozlaşdırıla bilən vəziyyət yaradır. Bundan sonra da qiymətlərin 65–70 dollar ətrafında qalması daha realdır, yəni 70 dolları keçməsi və ya 60 dolların altına düşməsi gözlənilmir".
Mehriban Yariyeva
13:37 13.08.2025
Oxunuş sayı: 1468
