Naxçıvanda ipoteka sahəsində idarəetmə təkmilləşdiriləcək
Naxçıvan Muxtar Respublikasında ipoteka sahəsində idarəetmə təkmilləşdiriləcək.
Crossmedia.az xəbər verir ki, bununla bağlı Naxçıvan Muxtar Respublikası Ali Məclisi sədrinin birinci müavini Bəxtiyar Məmmədov müvafiq Fərman imzalayıb.
Sənədə əsasən, “Naxçıvan İpoteka Fondu” Açıq Səhmdar Cəmiyyəti “Naxçıvan İpoteka Fondu” qeyri-kommersiya hüquqi şəxsinə çevrilmə yolu ilə yenidən təşkil ediləcək.
Naxçıvan İpoteka Fondu (bundan sonra – Fond) “Naxçıvan İpoteka Fondu” Açıq Səhmdar Cəmiyyətinin hüquqi varisi olacaq və onun bütün hüquq və öhdəlikləri, habelə əmlakı Fonda keçəcək.
Fond Naxçıvan Muxtar Respublikasında əhalinin yaşayış sahəsi ilə uzunmüddətli ipoteka kreditləşməsi vasitəsilə təmin edilməsi mexanizminin yaradılması, ipoteka kreditləşməsinə maliyyə resurslarının cəlb olunmasına köməklik göstərilməsi ilə bağlı işləri yerinə yetirən qeyri-kommersiya hüquqi şəxsi olacaq.
Fondda təsisçinin səlahiyyətlərinin həyata keçirilməsi aşağıdakılara həvalə edilib:
Naxçıvan Muxtar Respublikasının Nazirlər Kabinetinə:
Fondun nizamnaməsinin təsdiqi və nizamnamə kapitalının miqdarının müəyyən edilməsi;Fondun icra orqanının yaradılması, onun səlahiyyətlərinin müəyyənləşdirilməsi və səlahiyyətlərinə vaxtından əvvəl xitam verilməsi;
Fondun yenidən təşkili və ləğvi barədə qərarın qəbul edilməsi;
Fonda:
Naxçıvan Muxtar Respublikasının Nazirlər Kabineti ilə razılaşdırmaqla Fondun strukturunun, əməyin ödənişi fondunun, işçilərinin say həddinin və onların əməkhaqlarının məbləğinin (vəzifə maaşının, vəzifə maaşına əlavələrin, mükafatların və digər ödənişlərin) təsdiq edilməsi;
Azərbaycan Respublikasının Mülki Məcəlləsi ilə hüquqi şəxsin təsisçisinin səlahiyyətlərinə aid edilmiş digər məsələlərin həll edilməsi.
Naxçıvan Muxtar Respublikasının Nazirlər Kabineti:
Naxçıvan Muxtar Respublikası Ali Məclisi sədrinin aktlarının bu Fərmana uyğunlaşdırılması ilə bağlı təkliflərini üç ay müddətində hazırlayıb Naxçıvan Muxtar Respublikası Ali Məclisinin sədrinə təqdim etməlidir;
Naxçıvan Muxtar Respublikası Nazirlər Kabinetinin normativ hüquqi aktlarının bu Fərmana uyğunlaşdırılmasını üç ay müddətində təmin edib Naxçıvan Muxtar Respublikası Ali Məclisinin sədrinə məlumat verməlidir;
mərkəzi icra hakimiyyəti orqanlarının normativ hüquqi aktlarının bu Fərmana uyğunlaşdırılmasını nəzarətdə saxlasın və bunun icrası barədə dörd ay müddətində Naxçıvan Muxtar Respublikası Ali Məclisinin sədrinə məlumat verməlidir;
Fondun nizamnaməsinin təsdiqini və “Naxçıvan İpoteka Fondu” Açıq Səhmdar Cəmiyyətinin nizamnamə kapitalının məbləği həcmində nizamnamə kapitalının formalaşdırılmasını bir ay müddətində təmin etməlidir;
bu Fərmandan irəli gələn digər məsələləri həll etməlidir.
Naxçıvan Muxtar Respublikasının Ədliyyə Nazirliyi mərkəzi icra hakimiyyəti orqanlarının normativ hüquqi aktlarının və normativ xarakterli aktların bu Fərmana uyğunlaşdırılmasını təmin edib Naxçıvan Muxtar Respublikasının Nazirlər Kabinetinə məlumat verməlidir.
17:42 08.08.2025
Oxunuş sayı: 6682
