SOCAR yeni istiqrazlarına görə növbəti kupon ödənişini həyata keçirib
Bu gün Azərbaycan Dövlət Neft Şirkəti (SOCAR) 1 noyabr 2021-ci ildə daxili kapital bazarları üçün buraxdığı yeni istiqrazlara görə növbəti kupon ödənişini həyata keçirib.
Crossmedia.az SOCAR-a istinadən xəbər verir ki, istiqraz sahiblərinin hesablarına 1 milyon 125 min ABŞ dolları köçürülüb və onların ümumi faiz gəlirləri 16,875 milyon dollara çatıb.
Bu məbləğ yekunda 22,5 milyon ABŞ dolları təşkil edəcək. Növbəti kupon ödənişi noyabrın 1-də olacaq.
İstiqrazların ümumi dəyəri 100 milyon ABŞ dollarıdır. Bunlar, illik gəlirliliyi 4,5 % təşkil edən, hər birinin nominal dəyəri 1 000 ABŞ dolları olan 100 min istiqrazdır.
Bu il martın 7-də isə SOCAR 200 milyon ABŞ dolları dəyərində "Yaşıl istiqraz"ları tədavülə buraxıb. İllik gəlirliliyi 6 % olan, hər birinin nominal dəyəri 1 000 ABŞ dolları olan 200 min istiqraza görə ilk kupon ödənişi iyunun 7-də baş tutub (Emissiya prospektinə əsasən, kupon ödənişi qeyri-iş gününə təsadüf edərsə, ödəniş növbəti ilk iş günü icra edilir).
SOCAR istiqrazları 9 ilə yaxındır ki, "Bakı Fond Birjası" QSC-də (BFB) ən çox ticarət olunan korporativ qiymətli kağızdır. Onlarla BFB-də 76 milyon ABŞ dolları məbləğində ticarət aparılıb və 1 430 əqd bağlanıb. Ümumilikdə, SOCAR İstiqrazları buraxılandan (2016) indiyə qədər şirkət vətəndaşlara və investorlara 44 milyon 875 min ABŞ dolları faiz ödəyib.
SOCAR İstiqrazlarını 1 və 5 saylı “ASAN xidmət” mərkəzlərindəki SOCAR İstiqrazları köşklərindən, Azərbaycanda rəsmi fəaliyyət göstərən investisiya şirkətlərindən əldə etmək mümkündür.
Əlavə məlumat üçün *1999 çağrı nömrəsi ilə əlaqə saxlamaq və yaxud socaristiqraz.az, socarcapital.az veb-saytlarına müraciət etmək lazımdır.
14:30 01.08.2025
Oxunuş sayı: 6369
