Qərbin sanksiyaları əks- effekt verir: "Avropaya daha çox ziyan dəyir, nəinki Rusiyaya"
Rusiya Prezidentinin mətbuat katibi Dmitri Peskov deyib ki, ölkə iqtisadiyyatı uzunmüddətli sanksiyalar şəraitində fəaliyyət göstərərək bu məhdudiyyətlərə qarşı müəyyən immunitet formalaşdırıb.
"Biz kifayət qədər uzun müddətdir ki, çoxsaylı sanksiyalar altında yaşayırıq və iqtisadiyyatımız məhdudiyyətlər altında fəaliyyət göstərir, ona görə də, əlbəttə, bu məsələdə artıq müəyyən immunitet qazanmışıq", - o qeyd edib.
Məlum olduğu kimi, Rusiya Ukrayna ilə müharibə başlayandan bəri ağır sanksiyalar altındadır. Buna baxmayaraq, hələ də geri çəkilmək. Belə təəssürat yaranır ki, sanki məhdudiyyətlərin heç bir təsiri olmur. Sanki havaya güllə atılır...
Bəs Peskovun dedikləri gerçəkdir, yoxsa manipulyasiya?
Bu barədə Crossmedia.az-a danışan iqtisadçı Xalid Kərimli bildirib ki, embarqolar Rusiya iqtisadiyyatına ziyan vurur: "Amma Rusiya böyük ölkədir, resurslarla zəngin ölkədir, daxili imkanları genişdir, bazarı böyükdür. Həm də heç də bütün dünya Rusiya ilə əlaqələri kəsməyib. Yalnız 45–50 ölkə bu sanksiyaları tətbiq edib.
Rusiya Çinlə, Hindistanla, Cənub ölkələri və Şərqlə ticarəti davam etdirir. Hətta bəzi Avropa ölkələrinin özü ilə də ticarət əlaqələrini saxlayır. Tam olaraq Rusiya dünyadan təcrid edilməyib. Təbii ki, bu təcrid daha ciddi ziyanlar verə bilərdi. Amma indiki sanksiyaların da real təsirləri var. Peskovun özü də deyir ki, ‘immunitet’ formalaşır – yəni Rusiya tədricən bu şəraitdə işləməyə, bazarları yenidən qurmağa çalışır”.
Ekspertin fikrincə, Qərbdə gözləyirdilər ki, Rusiyanı üç ildən daha qısa müddətdə sanksiyalarla tam çökdürəcəklər, amma buna nail ola bilmədilər: "Rusiyada iqtisadi artım davam edir, hətta Avropanınkından daha çoxdur. Eyni zamanda insanların gəlirləri də artır. İşsizliklə bağlı ciddi narazılıqlar yoxdur. Rusiya prezidentindən razılıq səviyyəsi 80 faizdən aşağı düşmür. Sanksiyaların Rusiya iqtisadiyyatına ziyanları çoxdur, amma Rusiya dözür. Ümumiyyətlə, Avropaya daha çox ziyan dəyir, nəinki Rusiyaya".
X. Kərimlinin sözlərinə görə, Şərqi Avropada davam edən savaş, həmçinin Rusiyaya qarşı sanksiyalar qlobal iqtisadiyata, o cümlədən Azərbaycana təsir edir: " Logistika kanallarına, yükdaşımalara, tranzit daşımalarına çətinləşdirir. Hava nəqliyyatının da işi çətinləşib. Ziyanlar var, amma dünya iqtisadiyyatı bu ziyanları müəyyən qədər absorbsiyaya uğradır. İqtisadi artım sürəti aşağı düşür, inflyasiya yüksək olaraq qalır. Məsələn, Azərbaycanda da inflyasiyanın yüksək olmasının səbəblərindən biri qarşılıqlı olaraq ölkələrin bir-birinə tətbiq etdiyi sanksiyalar və geosiyasi gərginlikdir”.
Mehriban Yariyeva
13:17 31.07.2025
Oxunuş sayı: 1445
