“Azəristiliktəchizat” yenə bildiyini etdi: "İşıq və qaz da bahalaşacaq" - Mənfi örnək!
Tarif (Qiymət) Şurası “Azəristiliktəchizat” ASC-nin göstərdiyi xidmətin tarifinin tənzimlənməsi barədə” 29 dekabr 2024-cü il tarixli qərarında dəyişiklik edib. Belə ki, qərara əsasən, əhali istehlakçı qrupuna göstərilən istilik xidmətinin tarifi 1 Qkal üçün ƏDV daxil olmaqla 14,6 manatdan 21 manata, sayğac quraşdırılmadığı halda isə aylıq 1 kvadratmetr üçün ƏDV daxil olmaqla 0,3 manatdan 0,45 manata çatdırılıb. Bu isə qiymətin 50% artması deməkdir.
Bu, kifayət qədər ciddi artımdır. Ümumiyyətlə, zaman- zaman kommunal xərclərlə bağlı müşahidə edilən artımlar əhalinin rifahına heç də müsbət təsir göstərmir. Əksinə, gecə - gündüz işləyib aylıq maaş qazanan insanların əməkhaqqısının kommunal xərclər üçün nəzərdə tutulan hissəsinin hər iki- üç aydan bir artması, əlbəttə, xoşagələn hal deyil. Ən maraqlısı isə budur ki, qurumlar adətən belə qərarları əsalandırmağa da lüzum duymurlar. İnsanda belə təəssürat yaranır ki, sanki istədikləri kimi, öz ideyalarına və arzularına uyğun bu kimi artımları edirlər. Hətta bir az obrazlı desək, sanki yatıb yuxu görürlər.
ReAL partiyasının sədri, iqtisadçı - ekspert Natiq Cəfərlinin Crossmedia.az-a dedikləri də bunu göstərir:
"“Azəristiliktəchizat” ASC-nin belə qərar alması anlaşılan deyil. Çünki birdən-birə qiymətləri 50% artırıblar. Qiymətlərin birdən 50% artması kifayət qədər ciddi məsələdir. Xüsusən də heç bir əsaslandırma olmadan artırılması təbii ki, əhalinin narazılığına səbəb olacaq. Bu addım həm də bir növ xəbərçi funksiyası daşıyır. Belə ki, gələcəkdə elektrik enerjisi və qaz tariflərinin artmasını da gündəmə gətirir”.
Ayhan
12:26 31.07.2025
Oxunuş sayı: 2198
