ASK: Azərbaycanın ECO regionu ölkələri ilə xarici ticarət dövriyyəsinin həcmi 8 milyard dollardır
Azərbaycan son illərdə genişmiqyaslı iqtisadi islahatlar həyata keçirərək sahibkarlığın inkişafına xüsusi diqqət yetirib. Bu təcrübənin ECO regionu ölkələri ilə paylaşılması və qarşılıqlı investisiya təşviqinin gücləndirilməsi üçün konkret əməkdaşlıq mexanizmlərinin yaradılmasına ehtiyac duyulur.
Crossmedia.az xəbər verir ki, bu fikirləri Azərbaycan Sahibkarlar Təşkilatları Milli Konfederasiyasının (ASK) prezidenti Məmməd Musayev Şuşada keçirilən 6-cı ECO biznes-forumunda çıxışı zamanı səsləndirib.
Onun sözlərinə görə, hazırda Azərbaycanın ECO regionu ölkələri ilə xarici ticarət dövriyyəsi 8 milyard ABŞ dolları təşkil edir ki, bu da ölkənin ümumi ticarət dövriyyəsinin təxminən 17 faizinə bərabərdir.
“Forumun əsas mövzusu – investisiya və ticarətin təşviqi bizim üçün son dərəcə aktualdır. ECO regionunun davamlı inkişafı və iqtisadi inteqrasiyasında bizneslərin rolu əhəmiyyətlidir. Təşkilat olaraq üzvlərimizlə birlikdə ticarət və investisiya əlaqələrinin genişlənməsinə, xüsusilə yaşıl iqtisadiyyat, aqrar istehsal, rəqəmsal transformasiya və logistika sahələrində birgə təşəbbüslərin dəstəklənməsinə önəm veririk. Region daxilində ortaq müəssisələrin yaradılması, əlverişli biznes və investisiya mühitinin formalaşdırılması üçün hüquqi bazaların uyğunlaşdırılması bu forumun əsas töhfələrindən biri ola bilər. ECO ölkələrinin sahibkar təşkilatları ilə əməkdaşlığa, təcrübə mübadiləsinə və daimi dialoqa açığıq. Hazırda bir sıra ölkələrin biznes dəstək qurumları ilə fəal əməkdaşlıq edirik. Bu forumun nəticəsində yeni niyyət protokollarının, birgə platformaların və strateji təşəbbüslərin formalaşacağına inanırıq”, – deyə M.Musayev vurğulayıb.
12:15 02.07.2025
Oxunuş sayı: 939
