Azərbaycanda "Ödəniş xidmətləri və ödəniş sistemləri haqqında" qanun dəyişəcək
Azərbaycan Mərkəzi Bankı (AMB) "Banking-as-a-Service" və digər innovativ xidmətlərlə bağlı hüquqi dəyişikliklərə hazırlaşır.
Crossmedia.az xəbər verir ki, bunu AMB-nin nümayəndəsi Ülfət Yusifov Bakıda keçirilən növbəti Maliyyə və Texnologiyalar Sərgisində ("Fintex Sammit") bildirib.
Onun sözlərinə görə, son dövrlər banklar, ödəniş və elektron pul təşkilatlarından quruma "Banking-as-a-Service" (BaaS), "Fintech-as-a-Service" (FaaS) və "Software-as-a-Service" (SaaS) xidmətlərinin tətbiqi ilə bağlı çoxsaylı müraciətlər daxil olub: "Bu xidmətlər maliyyə sektorunda rəqəmsal transformasiyanın genişlənməsi, xərclərə qənaət və texnoloji üstünlüklərlə bağlı olaraq aktualdır. Məsələn, "Banking-as-a-Service" xidmətində banklar öz infrastrukturunu API-lar vasitəsilə rəqəmsal platformalara ötürür. Bu, bank olmayan təşkilatların müştərilərə kredit və digər maliyyə xidmətləri təqdim etməsinə imkan yaradır”.
AMB rəsmisi qeyd edib ki, "FinTech-as-a-Service" modeli daha çox startaplara və lisenziyası olmayan platformalara ödəniş xidmətləri, virtual kartlar, elektron pul kisələri təqdim olunması üçün istifadə edilir: "Software-as-a-Service" isə müxtəlif proqram təminatlarının onlayn şəkildə digər təşkilatlara təqdim edilməsini nəzərdə tutur".
Onun sözlərinə görə, bu xidmətlər şirkətlər üçün infrastruktur qurmaq yerinə üçüncü tərəflərdən xidmət almağa şərait yaradır, bu da maliyyə baxımından daha sərfəlidir.
Bununla belə, U.Yusifov bu xidmətlərin müəyyən risklər də daşıdığını vurğulayıb: "Məlumat təhlükəsizliyi, komplayens riski, reputasiya zədələnməsi, texniki asılılıq, inteqrasiya çətinlikləri və xidmət təminatçısının iflas riski əsas təhlükələr sırasındadır. Beynəlxalq təcrübədə xüsusilə Litva, Estoniya və Avstriyada bu xidmətlərin göstərilməsi üçün normativ baza mövcuddur və banklara, ödəniş və elektron pul təşkilatlarına bu fəaliyyətlərə icazə verilir. AMB olaraq innovativ məhsullara həmişə müsbət yanaşmışıq. Hazırda bu sahədə daxil olan müraciətləri nəzərə alaraq "Ödəniş xidmətləri və ödəniş sistemləri haqqında" qanunda və digər normativ sənədlərdə dəyişiklik layihəsi hazırlayırıq. Hesab edirik ki, bu dəyişikliklər dediyim xidmətlərin Azərbaycanda da qanuni şəkildə tətbiqini təmin edəcək. Eyni zamanda xidmətlərin tətbiqində risklərin minimuma endirilməsi istiqamətində də addımlar atılacaq".
15:48 24.06.2025
Oxunuş sayı: 9405
