"Azərbaycan-Qazaxıstan iqtisadi əlaqələrinin inkişafı üçün böyük perspektivlər var" - İqtisadçı
Qazaxıstanın Azərbaycandakı Səfirliyindən bildirilib ki, iki ölkə arasında ticarət-iqtisadi, investisiya, nəqliyyat-logistika, enerji və tikinti sahələrində ikitərəfli əməkdaşlığın mövcud vəziyyəti və perspektivləri müzakirə edilib. Məlumata görə, səfir Alim Bayel iqtisadiyyat naziri Mikayıl Cabbarovla görüş keçirib. Görüşdə diplomat ikitərəfli ticarət dövriyyəsinin artmaqda davam etdiyini qeyd edib: "Xüsusi məmnunluq doğuran fakt ondan ibarətdir ki, 2025-ci ildə Qazaxıstan ilk dəfə olaraq Azərbaycanın əsas buğda tədarükçüsünə çevrilib və Azərbaycanın taxıl idxalının 88%-ni təmin edib".
Öz növbəsində, M.Cabbarov Qazaxıstanla iqtisadi əməkdaşlığın inkişafının Azərbaycan üçün strateji əhəmiyyət daşıdığını vurğulayıb. Bu kontekstdə o, bütün region üçün geoiqtisadi əhəmiyyətini kəsb edən Transxəzər Beynəlxalq Nəqliyyat Marşrutunun (TBNM), Xəzər dənizinin dibi ilə fiber-optik rabitə xəttinin (FORX) çəkilişini, Qazaxıstan enerji daşıyıcılarının Azərbaycan ərazisindən tranzitini, habelə Xəzər dənizinin dibi ilə dərin dəniz elektrik kabelinin çəkilməsi kimi iri ortaq layihələrin həyata keçirilməsini yüksək qiymətləndirib.
A. Bayel azərbaycanlı naziri Qazaxıstan rəhbərliyinin Azərbaycanla sənaye kooperasiyasının inkişafına xüsusi diqqət yetirdiyi barədə məlumatlandırıb. Bu çərçivədə o, Qazaxıstanda infuziya məhlullarının birgə istehsalını təşkil etməyi təklif edib. A.Bayel, həmçinin, Azərbaycan tərəfinə Alagöl gölünün sahilində sanatoriya-kurort kompleksi inşa etməyi təklif edib. M. Cabbarov bu təşəbbüslər üzrə əməkdaşlığa hazır olduğunu bildirib. Həmsöhbətlər onların reallaşdırılması detalları barədə müzakirə aparıblar.
Tərəflər həmçinin yaşayış və sosial obyektlərin tikintisi ilə məşğul olan tikinti şirkətlərinin fəaliyyətinin daha da genişləndirilməsini müzakirə ediblər. Bir sıra Qazaxıstan şirkətlərin artıq Azərbaycanda tibb obyektləri və yaşayış binalarının tikintisinə başladığı məmnunluqla qeyd olunub. Bu istiqamətdə Qazaxıstanda əməkdaşlıq imkanları nəzərdən keçirilir.
Bu barədə iqtisadçı Natiq Cəfərli Crossmedia.az-a açıqlama verib.
N.Cəfərlinin sözlərinə görə, enerji və logistika sahəsində əməkdaşlıq imkanları xüsusilə diqqət çəkir: “Orta Dəhliz layihəsi çərçivəsində hər iki ölkə doğru-dürüst addımlar atsa, Azərbaycan Qazaxıstan üçün, Qazaxıstan isə Azərbaycan üçün əvəzolunmaz ticarət tərəfdaşına çevrilə bilər”.
İqtisadçı bildirib ki, hazırda maraqlı iqtisadi proseslər gedir və əməkdaşlıq dinamik şəkildə inkişaf edir: "Qazaxıstan neftinin dünya bazarlarına çıxarılmasında Azərbaycanın rolu getdikcə artır. Əvvəllər Qazaxıstan neftinin böyük hissəsi Novorossiysk limanından ixrac olunurdu:
Rusiya-Ukrayna müharibəsi bu limanın təhlükəsizliyinə ciddi problem yaradıb, bu səbəbdən Qazaxıstan nefti getdikcə daha çox Azərbaycan üzərindən Avropaya ixrac olunacaq:
O , əlavə edib ki, Qazaxıstan artıq Azərbaycanın əsas taxıl tədarükçüsünə çevrilib: "Əvvəllər bu mövqedə Rusiya dayanırdısa da, son dövrlər Qazaxıstandan taxıl idxalı bir neçə dəfə artıb. Bu hal Azərbaycanın ərzaq təhlükəsizliyində mühüm rol oynayır. Qazaxıstan həm də Azərbaycan məhsulları üçün böyük bir bazardır: 20 milyondan artıq əhalisi olan bu ölkə yerli məhsulların ixracı üçün əlverişli imkanlar yaradır".
İqtisadçı sonda bildirib ki, ən böyük perspektiv məhz logistik layihələrlə bağlıdır: "Orta Dəhlizin əsas iki dayağını təşkil edən Azərbaycan və Qazaxıstan gələcəkdə yükdaşıma sahəsində birgə fəaliyyət göstərərək əsas tranzit ölkələrə çevrilə bilərlər".
Fatimə Nəbiyeva
16:54 23.06.2025
Oxunuş sayı: 9309
