Maliyyə Nazirliyi: Beynəlxalq mühasibat standartlarına uyğunluq əsas prioritetdir
Azərbaycanın Maliyyə Nazirliyində dünyanın qabaqcıl auditor və konsaltinq şəbəkələrindən olan “Deloitte”, “PricewaterhouseCoopers” (PwC), “Ernst & Young” (EY) və “KPMG” şirkətlərinin nümayəndələri ilə görüş keçirilib.
Bu barədə Crossmedia.az Maliyyə Nazirliyinə istinadən xəbər verir.
Bildirilib ki, görüşdə mühasibat və vergi uçotu sahəsində islahatların həyata keçirilməsi ilə bağlı məsələlər müzakirə olunub.
Tədbir çərçivəsində mühasibat uçotu və vergi sahəsində mövcud olan təcrübələr və beynəlxalq standartlarla uyğunlaşma istiqamətində təkliflər irəli sürülüb. Görüşün əsas mövzuları arasında amortizasiya və təmir xərclərinin uçotu üzrə vergi məqsədləri üçün daha effektiv mexanizmlərin yaradılması, mühasibat uçotu sahəsində sertifikatlaşdırılmış proqram təminatlarının tətbiqi, həmçinin GRP (Government Resource Planning) sahəsində beynəlxalq təcrübələrin öyrənilməsi yer alıb.
Bundan əlavə, dövlət fondlarının IPSAS (Dövlət Sektorunda Mühasibat Uçotu üzrə Beynəlxalq Standartlar) və IFRS (Beynəlxalq Maliyyə Hesabatı Standartları) ilə işləməsinə dair beynəlxalq təcrübənin tətbiqi və Publik Hüquqi Şəxslər tərəfindən mühasibat uçotunun aparılması və maliyyə hesabatlarının tərtib edilməsində beynəlxalq standartlara uyğunluğun təmin edilməsi mövzularında fikir mübadiləsi aparılıb.
Maliyyə nazirinin müavini Azər Bayramov mühasibat uçotu və maliyyə hesabatlılığı sahəsində beynəlxalq təcrübəyə uyğun islahatların davam etdirilməsinin hazırda Maliyyə Nazirliyinin qarşısında dayanan əsas çağırışlardan olduğunu bildirib və dünyanın qabaqcıl auditor və konsaltinq şəbəkələri ilə keçirilən bu görüşün həmin vəzifələrin həyata keçirilməsinə yönəlmiş mühüm bir addım olduğunu qeyd edib.
19:35 02.05.2025
Oxunuş sayı: 877
