Bakı-Pekin iqtisadi əməkdaşlığının prioritetləri açıqlanıb
Azərbaycan təkcə logistika qovşağı rolunu deyil, həm də Çin və digər dövlətlərin şirkətləri üçün bütöv ticarət və sənaye mərkəzinin formalaşdırılmasını hədəfləyir.
Crossmedia.az xəbər verir ki, bunu Azərbaycanın Çindəki ticarət nümayəndəsi Teymur Nadiroğlu bu ölkənin “Global Times” nəşrinə müsahibəsində bildirib.
Prezidenti İlham Əliyevin Çinə dövlət səfəri çərçivəsində imzalanmış sazişləri şərh edən T.Nadiroğlu, səfərin iki ölkə arasında hərtərəfli strateji tərəfdaşlığın qurulması kontekstində ikitərəfli əməkdaşlığın aktivləşdirilməsi üçün mühüm əhəmiyyət daşıdığını qeyd edib.
Onun sözlərinə görə, bu "daha dərin və hərtərəfli iqtisadi əməkdaşlıq üçün yol açacaq".
T.Nadiroğlu bildirib ki, investisiyalar, ticarət, bərpa olunan enerji, həmçinin istehsalın lokallaşdırılması - Bakı və Pekin arasındakı əməkdaşlığın dərinləşdirilməsi üçün əsas istiqamətlərdən biridir.
Bununla yanaşı, o qeyd edib ki, Çin həmişə Azərbaycan üçün vacib bazar olub: "Biz Çində ticarət kanallarımızı genişləndirməkdə, bu böyük bazarın imkanlarından istifadə etməkdə maraqlıyıq".
"Son illər Çin şirkətlərinin nümayəndələrinin və rəsmilərin Azərbaycana səfərlərinin sayının artdığını müşahidə edirik. Bu isə şübhəsiz ölkələrimiz arasında ümumi iqtisadi əməkdaşlığa çox müsbət təsir göstərəcək", - T.Nadiroğlu bildirib.
O qeyd edib ki, Azərbaycan "Bir kəmər, bir yol" təşəbbüsündə iştirak edən ölkələr üçün mühüm əhəmiyyət kəsb edən Transxəzər Beynəlxalq Nəqliyyat Marşrutunda (TBNM) əsas rol oynayır: "Bu, Azərbaycanın strateji logistika qovşağı kimi mövqeyini möhkəmləndirib. Bizim məqsədimiz təkcə logistika qovşağı olmaq deyil, həm də Çin və digər ölkələrin şirkətləri üçün ticarət və istehsal mərkəzi olmaqdır".
10:55 30.04.2025
Oxunuş sayı: 9299
