Ramin Məmmədov Dini Komitənin könüllüləri ilə görüşüb
Dini Qurumlarla İş üzrə Dövlət Komitəsinin sədri Ramin Məmmədov Dövlət Komitəsinin könüllüləri ilə görüşüb.
Crossmedia.az xəbər verir ki, görüşdə Dövlət Komitəsinin sədri Prezident İlham Əliyevin çağırışı əsasında başladılan könüllülük hərəkatının dövlətin həyata keçirdiyi gənclər siyasətinin mühüm istiqamətlərindən birini təşkil etdiyini bildirib. O, Dini Komitə könüllülərinin bu prosesin fəal üzvləri olduğunu nəzərə çatdırıb
Ramin Məmmədov gənclərin könüllü olaraq müxtəlif sosial layihələrdə fəal iştirak etməsinin vacibliyini də vurğulayıb:
"Gənclər sosial işlərdə fəal iştirakla yanaşı, müxtəlif təşəbbüsləri ilə cəmiyyətin inkişafında əhəmiyyətli rol oynayırlar. Könüllülərin təşəbbüskarlığı ölkənin inkişafı üçün əvəzsizdir və gənclərin müxtəlif sahələrdəki fəaliyyətlərinin dəstəklənməsi üçün Dövlət Komitəsi tərəfindən daha çox layihələr həyata keçiriləcək".
Ramin Məmmədov gənclərin cəmiyyətin inkişafına töhfə verən, müsbət dəyişikliklər yaradan layihələrdə iştirak etmələrinin önəmli olduğunu və bu prosesin davamlılığını təmin etmək üçün Dövlət Komitəsinin bütün imkanlarını səfərbər etməyə hazır olduğunu diqqətə çatdırıb.
Gənclər isə iştirak etdikləri təlimlər və qazandıqları təcrübələr barədə öz təəssüratlarını bölüşərək qeyd ediblər ki, bilik və bacarıqlarının inkişafında, mütəxəssis kimi formalaşmalarında bu layihə mühüm rol oynayır.
Görüşdə təşkili nəzərdə tutulan layihələrlə bağlı təkliflər səsləndirilib, fikir mübadiləsi aparılıb.
Qeyd edək ki, Dövlət Komitəsinin yeni tərkibdə formalaşdırılmış növbəti könüllü layihəsi “AMİN könüllüləri” adlandırılıb.
AMIN (Azerbaijan Multicultural Information Network) - Dövlət Komitəsinin xidmətlərinin elektronlaşdırılması ilə bağlı yeni layihəsidir.
12:40 10.04.2025
Oxunuş sayı: 10638
