Kənd Təsərrüfatı Nazirliyinin həbsdə olan sabiq vəzifəli şəxsinə bəraət verilib
Cinayət Məcəlləsinin bir neçə maddəsi üzrə ittiham olunan Kənd Təsərrüfatı Nazirliyinin “Aqroservis” ASC-nin Cəlilabad regional nümayəndəliyinin Lənkəran-Lerik-Astara rayon bölməsinin rəhbəri olmuş Rzayev Rahim Fəxrəddin oğluna ittiham olunduğu bir maddə üzrə bəraət verilib.
Crossmedia.az-ın əldə etdiyi məlumata görə, bu barədə qərar Lənkəran Ağır Cinayətlər Məhkəməsində verilib.
Qərara əsasən, ona Cinayət Məcəlləsinin 308.2-ci (vəzifə səlahiyyətlərindən sui-istifadə etmə ağır nəticələrə səbəb olduqda) maddəsi ilə dövlət ittihamçısı qeyd edilən hissədə bəraətverici əsasla ittihamdan imtina etdiyi üçün bəraət verilib.
Təqsirləndirilən şəxsin cinayət işi üzrə məhkəmə baxışı Cinayət Məcəlləsinin 179.3.2-ci (külli miqdarda və xüsusilə külli miqdarda ziyan vurmaqla mənimsəmə) və 29,318.1-ci (Azərbaycan dövlət sərhədini qanunsuz keçməyə cəhd) maddəsi ilə davam etdirilir.
Qeyd edək ki, Rahim Rzayev Aqroservis ASC-nin Cəlilabad regional nümayəndəliyində və digər bölmələrdə aparılan yoxlamalar nəticəsində aşkar olunan ciddi pozuntulardan sonra həbs olunub.
İttihama görə, təqsirləndirilən şəxs öz qulluq mövqeyindən istifadə edərək ona etibar edilən əmlakı küllimiqdarda ziyan vurmaqla mənimsəyib.
Rahim Rzayev, vəzifəli şəxs kimi ASC-nin kənd təsərrüfatı məhsulları istehsalçılarının kənd təsərrüfatı istehsalı (kənd təsərrüfatı texnikası,texnoloji avadanlıq, o cümlədən suvarma sistemləri dəsti və avadanlığı, aqrokimyəvimaddələr, bitki mühafizəsi vasitələri, sertifikatlı toxum və ting) ilə təmin edilməsi, aqrotexnikixidmətlər göstərilməsi və bu sahədə fəaliyyətin təşkilinin həyata keçirilməsi sahəsində fəaliyyətini pozmaqda ittiham olunub.
12:00 09.04.2025
Oxunuş sayı: 9936
