Mənimsəmədə təqsirləndirilən sahibkar ev dustaqlığına buraxılıb
Külli miqdarda mənimsəmədə və leqallaşdırmada təqsirləndirilən Fəqani Rəhimovun cinayət işi üzrə məhkəmənin növbəti prosesi keçirilib.
Crossmedia.az xəbər verir ki, bu gün Bakı Ağır Cinayətlər Məhkəməsində hakim Rasim Sadıxovun sədrliyi ilə keçirilən prosesdə təqsirləndirilən şəxs ifadə verib.O, ifadəsində bildirib ki, onun tikinki şirkəti olub və Qobustanda fəaliyyət göstərib: ""İnşaat-F" adlı şirkəti 2006-cı ildə yaratmışam. Əsasən, binaların və yolların bərpası işi ilə məşğul olmuşam".
Dövlət ittihamçısı bildirib ki, təqsirləndirilən şəxs 384 min manat xərcləyib və qalan 32 min manatı mənimsəyib. Bu pul Qobustan İcra Hakimiyyətinin nümayəndəsi və qeyriləri arasında bölünüb.
Daha sonra təqsirləndirilən şəxsin vəkili Vüsal İbadov bildirib ki, F.Rəhimov müxtəlif vaxtlarda keçirdiyi infrakt və yol qəzasında xəsarət alması səbəbindən səhhətində ciddi problemlər yaranıb. O, ürək əməliyyatı da keçirib və hazırda müalicəyə ehtiyacı var. Təqsirləndirilən şəxsin ittiham olunduğu cinayət əməlində isə ciddi təhlükə mövcud deyil və o, ziyanı tam ödəyib. Vəkil onun ev dustaqlığına buraxılmasını xahiş edib.
Hakim bildirib ki, daxil olmuş sənədlərə görə, vurulan 62 min 400 manat maddi ziyan tam ödənilib və F.Rəhimovun səhhətində ciddi problem olması barədə Bakı İstintaq Təcridxanasından sənəd daxil olub.
Məhkəmə onun barəsində seçilmiş həbs qətimkan tədbirinin ev dustaqlığı qətimkan tədbiri ilə əvəz edilməsi barədə qərar çıxarıb.
Proses martın 11-də davam etdiriləcək.
Qeyd edək ki, iş adamı Fəqani Rəhimov külli miqdarda mənimsəmədə və cinayət yolu ilə əldə edilmiş pulları leqallaşdırmaqda ittiham olunur. Onun barəsində həbs qətimkan tədbiri seçilib. Ona Cinayət Məcəlləsinin 179.3.2-ci (Mənimsəmə və ya israf etmə, külli miqdarda törədildikdə) və 193-1.3.2 (Cinayət yolu ilə əldə edilmiş əmlakı leqallaşdırma, xeyli miqdarda törədildikdə) maddələri ilə ittiham irəli sürülüb.
İş üzrə zərərçəkmiş qismində Maliyyə Nazirliyi tanınıb.
İttihama görə, Fəqani Rəhimov 35 şirkətin rəhbəri olub. Onun şirkətləri dövlət qurumlarının keçirdiyi tenderlərdə dəfələrlə qalib gəlib. İbtidai istintaqın son günlərində onun barəsində həbs qətimkan tədbiri seçilib.
Ümumilikdə isə Fəqani Rəhimovun şirkətlərinə dövlət müəssisələri tərəfindən 600 min manata yaxın pul köçürülüb. Həmin vəsaitin 62 min 400 manatını həqiqi mənbəyinin gizlədilməsi məqsədilə leqallaşdırılıb.
11:56 18.02.2025
Oxunuş sayı: 33392
