Azərbaycanda yeni verilən "ASAN İmza" sertifikatlarının sayı azalıb
Bu ilin yanvar ayında Azərbaycanda 46 326 "ASAN İmza" elektron imza sertifikatı verilib.
Crossmedia.az xəbər verir ki, İqtisadiyyat Nazirliyi yanında Dövlət Vergi Xidmətindən bildirilib.
Məlumata görə, bu, ötən ilin eyni dövrü ilə müqayisədə 16,9 % azdır.
Hesabat dövründə "ASAN İmza"lar 30 983 müraciət üzrə təqdim olunub ki, bu da 1 il əvvələ nisbətən 5,7 % azdır.
"ASAN İmza" elektron imza sertifikatlarının üç növü var: fiziki şəxslər (vətəndaşlar), hüquqi şəxslər və sahibkarlıq fəaliyyəti ilə məşğul olan fiziki şəxslər və dövlət qulluqçuları üçün elektron imza sertifikatları. Fiziki şəxslər üçün elektron imza sertifikatları şəxsi istifadə üçün nəzərdə tutulub. Hüquqi şəxslər və sahibkarlıq fəaliyyəti ilə məşğul olan fiziki şəxslər, həmçinin dövlət qulluqçuları üçün nəzərdə tutulan elektron imza sertifikatları isə kommersiya və ya dövlət təşkilatını təmsil etmək və onun adından çıxış etmək səlahiyyətləri verir.
Sertifikatlar 3 il etibarlıdır.
14:16 17.02.2025
Oxunuş sayı: 7245
