Ölkədə sığorta hadisələrinin strukturu açıqlanıb
Azərbaycanda ötən il bağlanmış sığorta müqavilərinin və baş vermiş sığorta hadisələrinin sayına görə ən yüksək göstərici bazar ertəsi gününə təsadüf edib.
Crossmedia.az xəbər verir ki, bunu İcbari Sığorta Bürosunun baş informasiya meneceri Anar Səmədov Bakıda keçirilən Azərbaycan Maliyyə Forumunda bildirib.
Bundan başqa, onun sözlərinə görə, ötən il ən çox sığorta müqaviləsi 2009-2013-cü illərdə istehsal edilmiş nəqliyyat vasitələri üzrə bağlanıb və xüsusi çəkisi 23 % təşkil edib. Ən çox sığorta hadisəsi isə 2004-2008-ci illərdə istehsal edilmiş nəqliyyat vasitələrinin iştirakı ilə qeydə alınıb.
"Avtonəqliyyat vasitələrinin istehsal ilinə görə digər statistik göstəricilərə baxsaq, orta sığorta haqqı üzrə ən yüksək göstərici 1999-2003-cü illərdə istehsal edilmiş nəqliyyat vasitələrinə aid olub və 91 manat təşkil edib. Orta sığorta ödənişi üzrə ən yüksək göstərici isə 1993-cü ildən əvvəl istehsal edilmiş nəqliyyat vasitələrinə aid olub və 1 309 manat təşkil edib. Sığortalıların yaş qrupları üzrə statistikası isə göstərir ki, yaşı 36-50 arasında olanların bağladığı müqavilələrin sayı daha çoxdur və hadisələrin sayı da bu yaş qrupunda daha yüksəkdir. Zərər məbləğinə gəldikdə isə ən çox ödənilən zərər məbləği kateqoriyası 1 000 manatdan aşağı olan hissəyə aiddir. Bölgələr üzrə statistikaya baxsaq, ən çox hadisə Abşeron, Sumqayıt və Bakı şəhərlərinin payına düşüb" - deyə o qeyd edib.
13:12 14.02.2025
Oxunuş sayı: 7038
