Süni intellekt insanların dostudur, yoxsa rəqibi?: Bu sahələrdə çalışanlardan yeni iş axtarmalıdır
Günümüzdə inkişaf edən sahələr sırasına süni intellekt də daxildir. Süni intellektin inkişafı müxtəlif sahə əməkdaşlarının, tələbələrin, elmi işçilərin işlərini olduqca asanlaşdırır və bir çox şeyi əlçatan edir.
Məsələyə iki aspektdən yanaşaq. Birincisi, hər
şeyi bilən bir texnologiya vasitəsindən insanlar olduqca çox istifadə edir və
onun fəaliyyətindən məmnundurlar. İnsanların işlərinin asanlaşdırnası ilə
yanaşı, müxtəlif zavod və fabriklərdə,
şirkətlərdə süni intellekt istifadə daha məqsədəuyğun hesab edilir. İkinci məsələ
odur ki, şirkətlərdə, zavodlarda istifadə edilən süni intellekt hansısa insanın
işini əvəz edir. Bəli, süni intellekt, bir sıra sahələrdə insan əməyini əvəz
edir.
Bəs, gəlin, görək süni intellektin
inkişafı ilə hansı peşələrin sıradan çıxma ehtimalı daha yüksəkdir və bu, iş
bazarına necə təsir göstərə bilər? Süni intellekt texnologiyalarının gətirdiyi
dəyişikliklərə uyğunlaşmaq üçün insanlar hansı yeni bacarıqları inkişaf etdirməlidirlər?
Mövzu ilə bağlı İT mütəxəssisi Elvin Həsənov Crossmedia.az saytına açıqlama verib:
"Süni intellektin inkişafı ilə
bir sıra peşələrin sıradan çıxma ehtimalı artır. Xüsusilə təkrarlanan,
qaydalara əsaslanan və yaradıcılıq tələb etməyən sahələrdə ehtimal daha yüksəkdir.
Məsələn məlumatların daxil edilməsi, hüquqi araşdırmalar kimi analitik işlər,
avtomatlaşdırılmış sistemlərin daha dəqiq və sürətli olması səbəbindən risk
altındadır. Xidmət sektorunda kassirlər, çağrı mərkəzi operatorları və otel
qeydiyyatçıları chatbotlar və avtomatik ödəniş sistemləri ilə əvəz edilə bilər.
İstehsalat və logistika sahələrində isə robotlar fiziki əməliyyatları daha
effektiv şəkildə yerinə yetirir. Təkrarlanan işlərin azalması fonunda insanlar
daha çox yaradıcı, analitik və texnologiyaya əsaslanan işlərə yönəlməlidir. Süni
intellektin gətirdiyi dəyişikliklərə uyğunlaşmaq üçün insanlar bir sıra yeni
bacarıqları inkişaf etdirməlidir. Bu məsələdə texnoloji savadlılıq əsasdır".
Ekspert süni intellektin əvəz edə
bilməyəcəyi sahələri də qeyd edib:
“Yaradıcı düşüncə və innovasiya
qabiliyyəti insanın süni intellektdən üstün olduğu sahələrdə vacibdir. Çünki
süni intellekt analitik güclü olsa da, yaradıcı yanaşmaları təkrarlaya bilmir.
Problem həll etmə, kritik düşünmə və daim yeniliklərə adaptasiya bacarığı da bu
prosesdə xüsusi rol oynayacaq. Süni intellektin iş bazarına təsiri ilə işçilər
daha yüksək texnologiyaya əsaslanan rollara keçməli olduğu üçün təhsil və peşə
hazırlığı sahəsində ciddi yeniliklərə ehtiyac var".
"Ən əsası, insanlar süni
intellekti rəqib kimi deyil, əməkdaşlıq vasitəsi kimi qəbul etməlidir. Düşünürəm
ki, süni intellektin inkişafı həm texnologiya, həm də insan potensialının
birlikdə inkişafını təmin edə bilər", - o bildirib.
Ayhan Ağarzayev
17:30 29.01.2025
Oxunuş sayı: 7240
