AQTA sədri sahibkarların müraciətlərini dinləyib
Yanvarın 23-də Azərbaycan Qida Təhlükəsizliyi Agentliyinin (AQTA) sədri Qoşqar Təhməzli Agentliyin inzibati binasında çay, duz, qənd və şəkər emalı, idxal-ixracı və istehsalı sahəsində fəaliyyət göstərən sahibkarların müraciətlərini dinləyib.
Crossmedia.az Agentliyin İnformasiya təminatı və innovativ həllər şöbəsinə istinadən xəbər verir ki, AQTA sədri sahibkarların müraciətlərini və təkliflərini dinləyib, suallarını cavablandırıb, ayrı-ayrı məsələlər üzrə aidiyyəti üzrə göstərişlər verib.
Sahibkarlar mövcud qanunvericilik və tələblər barədə ətraflı məlumatlandırılıb. Çay, duz, qənd və şəkər emalı, idxal-ixracı və istehsalı zamanı təhlükəsizlik və keyfiyyət göstəricilərinin müvafiq tələblərə cavab verməsinin vacib olduğu onların diqqətinə çatdırılıb.
Qeyd edək ki, qida zəncirinin bütün mərhələlərində fəaliyyət göstərən sahibkarlıq subyektləri, o cümlədən qida məhsullarının istehsalı, emalı, idxal-ixracı sahəsində çalışan şəxslər və vətəndaşlar onları narahat edən məsələlərlə bağlı AQTA sədri ilə görüşə bilərlər. Görüşlərdə iştirak etmək üçün ad, soyad, fəaliyyət sahəsi, müraciətin məzmunu və telefon nömrəsini göstərməklə [email protected] elektron poçtu vasitəsilə müraciət etməklə və ya (+994 50) 515 51 87 nömrəsinə zəng etməklə, həmçinin vatsap üzərindən əlaqə saxlamaqla qəbula yazılmaq olar.
18:58 23.01.2025
Oxunuş sayı: 9664
