Maliyyə problemi ailə münasibətlərini kəskinləşdirə bilər
İqtisadi çətinliklər yalnız ailənin maddi vəziyyətinə deyil, münasibətlərə və psixoloji duruma da təsir göstərə bilər. Gəlir çatışmazlığı, borclar və artan xərclər ailə üzvləri arasında gərginliyə, fikir ayrılıqlarına və emosional uzaqlaşmaya səbəb ola bilər.
Bəs maddi sıxıntılar ailədaxili münasibətlərə nə dərəcədə təsir göstərir və bu gərginliyin qarşısını almaq üçün hansı addımlar atılmalıdır?
Mövzu ilə bağlı psixoloq Nizami Orucov Crossmedia.az-a açıqlamasında bildirib ki, maddi çətinliklər ailə münasibətlərinə kifayət qədər ciddi təsir göstərə bilər. Onun sözlərinə görə, burada söhbət yalnız pulun azlığından getmir: “Gəlirin kifayət etməməsi insanda gələcəklə bağlı narahatlıq, güvənsizlik və nəzarəti itirmək hissi yarada bilər. Bu emosional gərginlik də zamanla ailə daxilində ünsiyyətə və münasibətlərə yansıya bilir. Belə vəziyyətlərdə həyat yoldaşları arasında ən çox rast gəlinən problemlərdən biri günahlandırmadır. “Sən daha çox qazanmalı idin”, “Bu xərci niyə etdin?” kimi ifadələr problemi həll etmək əvəzinə tərəflərin bir-birinə qarşı müdafiəyə keçməsinə səbəb olur. Bir müddət sonra mübahisənin mövzusu puldan çıxıb münasibətin özünə çevrilə bilər. Digər tərəfdən, maddi sıxıntı insanın psixoloji resurslarını da azaldır. Davamlı stress, yuxu problemləri, əsəbilik və emosional tükənmə yarana bilər. İnsan onsuz da gərgin olduğu üçün ailə üzvlərinin adi davranışlarına belə daha həssas reaksiya verə bilər. Buna görə də bəzən problem tərəflərin bir-birini sevməməsi deyil, uzun müddət davam edən stressin münasibətə təsir etməsidir”.
Psixoloq qeyd edib ki, belə vəziyyətdə əsas məsələ problemin qarşısında bir-birinə qarşı deyil, birlikdə dayanmaqdır: “Büdcəni birlikdə müzakirə etmək, gəlir və xərcləri real şəkildə müəyyənləşdirmək, prioritetləri razılaşdırmaq və hər iki tərəfin məsuliyyətini bölüşdürmək vacibdir. Əsas məsələ “kim günahkardır?” sualından “bu vəziyyətdən necə çıxacağıq?” sualına keçməkdir. Valideynlərin maddi sıxıntılarını uşaqların yanında davamlı mübahisəyə çevirməməsi də önəmlidir. Uşaq ailədəki gərginliyi hiss edir və özünü təhlükəsiz hiss etməməyə başlaya bilər. Ona görə də böyüklərin iqtisadi problemini uşağın üzərinə emosional yük kimi qoymamaq lazımdır. Əlbəttə, hər ailənin maddi imkanları və münasibətləri fərqlidir. Bəzən iqtisadi çətinliklər mövcud problemləri sadəcə daha görünən edir. Əgər ailədə əvvəldən ünsiyyət, etibar və əməkdaşlıq zəifdirsə, maliyyə problemi bunu daha da kəskinləşdirə bilər. Maddi çətinlik zamanı ailənin əsas ehtiyacı yalnız daha çox pul deyil, həm də bir-birinə qarşı anlayış və əməkdaşlıqdır. İqtisadi problem müvəqqəti ola bilər, amma həmin dövrdə bir-birinə deyilən sözlər və göstərilən münasibət uzun müddət yadda qala bilər. Buna görə də çətin dövrdə ailə üzvlərinin bir-birini günahlandırmaq əvəzinə emosional olaraq dəstəkləməsi münasibətin qorunmasında ən vacib amillərdən biridir”.
Zərnigar Hüseynli
20:30 19.08.2026
Oxunuş sayı: 48
