Arzu Nağıyev: Azərbaycanla sərhəddə insidentlər törədilə bilər - MÜSAHİBƏ

Azərbaycan Prezidenti İlham Əliyev bir neçə gün əvvəl Zəngilanda yerli sakinlərlə görüş zamanı Cənubi Qafqazla bağlı çox mühüm mesajlar verib. Onun səsləndirdiyi fikirlər regional sabitlik, habelə perspektivlər baxımdan xüsusi əhəmiyyətlidir.

Ümumiyyətlə, bu gün dünyanın fərqli bölgələrində olduğu kimi Cənubi Qafqazda da yeni dinamika müşahidə olunur.

Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev dövlət başçısının səsləndirdiyi fikirlər kontekstində regional proseslərin inkişaf dinamikası barədə Crossmedia.az-a müsahibə verib:

- Prezident İlham Əliyev Zəngilan şəhərində sakinlərlə görüşdə bildirib ki, Ermənistanın arxasında duranların heç bir şansı yoxdur. Sizcə, bu mesajın konkret ünvanı kimlərdir?

- Zəngilandan verilən mesajlar bir neçə istiqamətə yönəlib. Bunlardan birincisi Ermənistana dəstək verən xarici havadarlardır. Bu sırada, əlbəttə, Qərb dairələrini və Rusiyanı xüsusi qeyd etmək lazımdır. Ümumiyyətlə, Ermənistanı silahlandıran və regionda balansı dəyişən qüvvələr nəzərdə tutulur. İkincisi isə Ermənistan daxilindəki revanşist qüvvələrə ismarış verilir ki, xarici havadarlara arxalanaraq Azərbaycanla qarşıdurma siyasəti aparmağın perspektivi yoxdur. Bu, tamamilə mənasızdır. Üçüncü bir tərəfdən isə bu mesaj regionda geosiyasi reallıqları dəyişmək istəyənlərə xəbərdarlıqdır.

- Ermənistan iqtidarı bu mesajlardan hansı nəticəni çıxarmalıdır?

- Əgər Ermənistan sülh istəyirsə, başa düşməlidir ki, başqa yol yoxdur. Azərbaycan açıq şəkildə göstərir ki, Ermənistan revanş siyasətinə üstünlük versə, bu, onun özü üçün ciddi təhlükə yaradacaq. Buna görə də İrəvan konstitusiya dəyişikliyinə getməli, ərazi iddialarından imtina etməli, kommunikasiya layihələri ilə bağlı konstruktiv mövqe ortaya qoymalıdır. Onlar unutmamalıdır ki, Azərbaycan sülhün bərqərar olması üçün öz gücünü, qüdrətini daim göstərə bilər. Bu baxımdan sülhün pozulması və digər revanşist ideyalar absurddur.

- Dövlət başçısı, həmçinin deyib ki, Azərbaycana nifrətlə yaşayan dairələr hakimiyyətə gəlsə, Ermənistan xalqının başı dərddə olacaq. Dövlət başçısının bu fikirlərini necə qiymətləndirirsiniz?

- Dövlət başçımız xəbərdarlıq edib ki, Azərbaycana nifrətlə yaşayanlar Ermənistanda hakimiyyətə gəlsələr Ermənistan xalqı özü çətin vəziyyətdə olacaq. Revanşizm Ermənistanı yenidən təcrid vəziyyətinə, iqtisadi böhrana sala, hərbi risklərlə üz- üzə qoya bilər. Keçmişdəki səhvləri təkrarlamaq Ermənistana baha başa gələ bilər. Kilsə, diasporun fəaliyyəti və ya qondarma erməni soyqımı iddialarını ortaya atmaqla onlar heç nəyə nail ola bilməyəcəklər.

- Ermənistanda revanşist ab- havada olanlar bunu necə başa düşməlidirlər?

- Regionda artıq tamam başqa ab- hava var. Hərbi yolla status- kvonu dəyişmək mümkün deyil. Azərbaycan həddən artıq güclü mövqeyə sahibdir. Büdcə ayırmalarında sülhün sabitliyi üçün 21 faiz müdafiə və təhlükəsizliyə ayrılır. Ən müasir silahların təminatı döyüşkən ordu, hibrit müharibələrin aparılmasına hazırlıq, risklərin qarşısının alınması kimi məsələlər bu məsələyə daxildir.

- Qarşıdan gələn parlament seçkilərində baş nazir Nikol Paşinyanın şanslarını necə qiymətləndirirsiniz?

- Ermənistanda müxalifət parçalanmış vəziyyətdədir. Cəmiyyətin əhəmiyyətli hissəsi keçmiş hakimiyyət komandalarının qayıdışı məsələsinə ehtiyatla yanaşır. Hətta müharibədə nəticəsində məğlub olmasına baxmayaraq, Paşinyan seçkilərdə qalib gəldi. Onun əsas üstünlüyü müharibədən qaçış və sabitlik strategiyasıdır. Ermənistan hakimiyyətindən tez- tez oxşar bəyanatlar verirlir.

- Sizcə, hazırkı hakimiyyət məğlub olsa, Paşinyanın iddia etdiyi kimi, yeni müharibə başlaya bilər?

- Paşinyan özü də qeyd edib ki, müxalifət hakimiyyətə gəlsə onlar daxili legitimlik qazanmaq üçün sərt xarici siyasət kursuna üstünlük verə bilərlər. Bu isə sərhəddə gərginliyi artıra bilər. Amma genişmiqyaslı müharibə təkcə Ermənistandan asılı deyil, regional və beynəlxalq balans da bu məsələdə mühüm rol oynayır. Rusiyanın göndərdiyi Karapetyanlar, Köçəryanlar, Sarkisyanlar və digərləri birmənanı şəkildə Ermənistan vətəndaşını istəməyən şəxslərdir. Onların öz maraqları var. Çünki Paşinyan qalib gəlsə Köçəryan və Sarkisyanı da Azərbaycandakı cinayətkarların aqibəti gözləyir.

- Ümumiyyətlə, mümkün sülh seçkilərin nəticəsindən nə qədər asılıdır?

- Bu, müəyyən qədər seçkilərdən asılıdır. Çünki hakimiyyətin iradəsi əsas faktordur. Paşinyan qalib gələcəyi təqdirsə sülh perspektivi daha real görünür. Bununla belə düşünürəm ki, reallıq Ermənistanın istənilən hakimiyyətini müəyyən məhdudiyyətlər daxilində hərəkət etməyə məcbur edəcək. Azərbaycanın bu gün atdığı humanist addımlar, həmçinin Türkiyə ilə sərhədin açılmasının bizdən asılı olması mühüm məsələlərdir. Ermənistan bu barədə düşünməlidir.

- Seçkilər yaxınlaşdıqca üçüncü qüvvələr provokasiyaya əl ata bilərmi? Bu ehtimalı necə qiymətləndirirsiniz?

- Bu, mümkündür. Sərhəddə lokal insidentlər törədilə bilər. Bəzi xarici aktorlar regionda tam formalaşma prosesində maraqlı olmaya bilər. Həmçinin seçki dövründə emosional fonun yüksəlməsi mümkündür. Əsas məsələ isə odur ki, Bakı və İrəvan vasitəçisiz danışıqlara gedir, kommunikasiya kanallarını açıq saxlayır. Mümkün təxibatların genişmiqyaslı gərginliyə şevrilməsinin qarşısının almaq lazımdır. Ali Baş Komandan cənab İlham Əliyevin apardığı siyasi kurs ərazi bütövlüyümüz, suverenliyimizn qorunmasına hesablanıb. Bizin kimsənin torpağında gözümüz yoxdur. Lakin sülhü qorumaq üçün əlimizdən gələni etməyə hazırıq. Buna hərbi, siyasi, iqtisadi və xalqla birlikdə olan gücümüz var.

🖨 Çap et

19:15 13.05.2026

Oxunuş sayı: 1155