Rusiya - Ukrayna müharibəsi tarixə "axmaqların müharibəsi" kimi düşəcək - RƏY
Ukrayna Prezidenti Volodimir Zelenski "Telegram" səhifəsində yazıb ki, son sutka ərzində Rusiya Ukrayna ərazisinə təxminən 300 zərbə dronu, 18 ballistik və 7 qanadlı raket atıb.
Onun sözlərinə görə, zərbələrin əsas hədəfi enerji infrastrukturu obyektləri olub.
"Təəssüf ki, yaşayış və mülki infrastruktura böyük ziyan dəyib. Dnepropetrovsk, Jitomir, Zaporojye, Kiyev, Odessa, Sumı, Xarkov və Donetsk vilayətləri zərbələrə məruz qalıb", - V.Zelenski yazıb.
Öz növbəsində, Ukrayna Hava Qüvvələri qeyd edib ki, Rusiya Silahlı Qüvvələri "Şahed", "Gerbera" tipli 293 zərbə dronu, "İskəndər-M" ballistik raketləri və S-300 raketlərindən istifadə edib.
Məlum olduğu kimi, Rusiya- Ukrayna savaşı artıq təxminən dörd ildir davam edir. Danışıqlar gündəmə gəlsə də, hələ ki üfüqdə sülh görünmür: Moskva ambisiyalarından əl çəkmir, Kiyev isə geri çəkilmir. Belə olan halda müharibənin hələ uzun müddət davam etməsi və gələcəkdə daha da genişlənməsi mümkündür.
Bu barədə Crossmedia.az-a danışan ReAl partiyasının sədri Natiq Cəfərli deyib ki, Rusiyanın Ukraynaya təcavüzü, artıq Böyük Vətən müharibəsindən daha çox davam edir: "Bu, Kreml rəhbəri Vladimir Putin və komandası üçün ciddi siqnal və anti-Pr elementidir. Bu yükün altından çıxmaq çətin olacaq, Kremlin rəsmi təbliğatçıları belə, bu qədər uzanan müharibəni izah etməyə söz tapmırlar.
Yeni tezisləri odur ki, Ukrayna qardaş xalqdır, biz total müharibə aparmırıq, vətəndaşlara ziyan vurmaq istəmirik – halbuki, Rusiyanın təcavüzü nəticəsində həlak olan dinc ukraynalıların sayı 30 mindən çoxdur. Yeri gəlmişkən, Mariupolda ölənlər buraya daxil deyil, çünki, onların dəqiq sayı bilinmir".
Siyasətçi xatırladıb ki, Rusiyanın Ukrayna ərazisində törətdiyi dağıntıların, vurduğu ziyanın dəyəri isə 1 trilyon dolları keçib: "Rusiyanın Ukraynaya təcavüzü, Ukraynanın isə bu təcavüzü önləmək üçün atmadığı addımlar, tarixdə “axmaqların müharibəsi”, kimi qalacaq, hər iki ölkədə gələcək nəsillər bu mənasız, qanlı savaşı lənətləyəcəklər...".
16:44 13.01.2026
Oxunuş sayı: 1455
