Taksi fəaliyyəti ilə məşğul olacaq avtomobillərin sayı azalacaq – Ekspert xəbərdarlıq edir
Son illərdə böyük şəhərlərdə əhali sayının artması və şəhərətrafı bölgələrdə yaşayan insanların sayının çoxalması nəqliyyat infrastrukturuna yeni tələblər gətirib.
Bu tendensiya sərnişin daşımalarının keyfiyyətinin yüksəldilməsi, xidmətlərin dayanıqlığının təmin olunması və təhlükəsizlik standartlarının beynəlxalq səviyyəyə uyğunlaşdırılması üçün əlavə tədbirlərin görülməsini zəruri edib. Belə ki, bu tədbirlərdən biri də yanacaq qiymətlərinin qaldırılmasıdır. Son dəyişikliklərə əsasən, Aİ-92 benzininin 1 litri 1,15 manat, dizelin 1 litri isə 1,10 manat olub. Yanacaqlardan toplanan yol vergisinin 7 qəpiyi “İctimai Nəqliyyat” Məqsədli Büdcə Fonduna yönələcək. Toplanan vəsait əhaliyə keyfiyyətli ictimai nəqliyyat xidmətləri göstərmək, yol hərəkətində təhlükəsizliyi təmin etmək və nəqliyyat xidmətlərinin əlçatanlığını artırmaq üçün istifadə olunacaq. Qərarların tam mətni Tarif (Qiymət) Şurasının rəsmi saytında (www.tariff.gov.az) yerləşdirilib.
Bu barədə Crossmedia.az-a açıqlama verən avtomobil üzrə ekspert Orxan Sabiroğlu yanacaq qiymətlərinin az da olsa qalxmasının taksi bazarına təsirsiz ötməyəcəyini qeyd edib:
" Hətta nəinki taksi bazarı, digər sahələrdə də cüzi də olsa artımlar qaçılmazdır. Taksi tariflərinin formalaşmasına tək yanacaq amili təsir etmir. Belə ki, taksi fəaliyyəti haqqında verilmiş son qərarlardan sonra istər-istər qanuni taksi fəaliyyəti ilə məşğul olacaq avtomobillərin sayı azalacaq. Bu da tələb-təklif fonunda qiymətlərin artmasına səbəb olacaq".
Ekspertin sözlərinə görə, taksi qiymətlərinin qalxmasında bir faktor da avtomobillərin yenilənməsi olub:
"Artıq 8 ildən çoxdur ki, köhnə avtomobillər taksi kimi fəalliyyət göstərə bilmir. Nəticədə daha yeni və bahalı avtomobillər xidmət göstərir. Bu avtomobillərin də dövri baxım və amortizasiya xərcləri nisbətən daha yüksəkdir. Bu da həm avtomobil sahiblərinə, həm də sahibkarların gəlirinə təsir edir. 2026 -cı il etibarı ilə taksi qiymətlərində artımlar aralıqlarla olacaq".
Fatimə Məmmədova
15:15 10.01.2026
Oxunuş sayı: 2792
