Bir dövrün sonu: Rusiyanın yeni dünya siyasi nizamında rolu olmayacaq!
ABŞ-nin Qrenlandiya ilə bağlı mövqeyi getdikcə daha radikal xarakter alır. Vaşinqtonun bu "iştahı" Avropa ilə gərginliyi daha da artırır. ABŞ-nin gələcəkdə Qrenlandiya ilə bağlı hərbi addımlar atacağı təqdirdə nələrin baş verəcəyi isə müzakirə mövzusudur. Maraqlıdır, Avropanın hazırkı sərt reaksiyası qarşısında ABŞ geri çəkiləcək, yoxsa sona qədər davam edəcək?
Bu barədə Crossmedia.az-a danışan politoloq Məhəmməd Əsədullazadə deyib ki, ABŞ prezidenti Donald Tramp Danimarka krallığına məxsus olan Qrenlandiyanı işğal etməyi planlaşdırır: "Bir NATO ölkəsinin digər bir üzv ölkəyə məxsus ərazini işğal edirsə, bu qurumun fəaliyyəti formal xarakter daşıya bilər. ABŞ prezidentinin bu siyasəti NATO nüfuzdan düşməsinə və rəqibləri qarşısında zəifləməsinə gətirib çıxara bilər. Həmçinin ABŞ və Avropa İttifaqı arasında siyasi böhran gətirib çıxarmaqla, Qərb Alyansının parçalanmasına yola açar. Bir sözlə, ABŞ Avropa İttifaqına məxsus olan ərazini güc yolu ilə öz ərazisinə daxil etməyi planlaşdırır. Bundan sonra, Avropa İttifaqı ABŞ Təhlükəsizlik çətirindən imtina edəcək. Göründüyü kimi, Rusiya dövlət başçısı Vladimir Putin və amerikalı həmkaı Tramp eyni ortaq siyasi xəttə malik olaraq Avropa dövlətlərinin ərazilərini işğal edir".
Ekspert söyləyib ki, baş verənlər Çin və Rusiyanı cəsarətləndirə və qonşularına qarşı yeni hərbi əməliyyatlar keçirməsinə stimul verər: "Onsuz da Rusiya Ukraynaya hücum edəndə planlarından biri, Qərb Alyansını parçalamaq və NATO -nu zəiflətmək idi. Qrenlandiya adası NATO mühafizə zolağındadır. ABŞ burada öz geosiyasi mövqelərini əhəmiyyətli dərəcədə artıra bilər. Amma Qrenlandiya adasını güc yolu ilə Danimarkadan alacaqsa, beynəlxalq hüququn çöküşü və ABŞ -Avropa müttəfiqiliyinin sonu demək olacaq. Təbii ki, Rusiya baş verənlərdən məmnun olacaq. Artıq Rusiya keçmiş postsovet məkanı və Şərqi Avropanın öz nüfuz dairəsi kimi tanınanmasını siyasi gündəmə gətirir. ABŞ Qərb yarımkürəsini öz təsir zonası elan etdiyi kimi, Rusiya da keçmiş SSRİ ərazilərini öz təsir dairəsi kimi tanınmasına çalışacaq. Amma, Rusiya ABŞ deyil, yəni Pekin Moskvanın bu siyasəti ilə razılaşmayacaq. Rusiyanın yeni dünya siyasi nizamında rolu olmayacaq. ABŞ beynəlxalq nizamı özü qurur və Qərb yarımkürəsini nizama saldıqdan sonra Rusiya və Çinin Avrasiyada təsirlərini zəiflədə bilər".
12:07 09.01.2026
Oxunuş sayı: 1694
