Türkiyəli politoloq: ABŞ olmadan Avropa heçdir, Rusiya isə...
ABŞ Prezidenti Donald Tramp ukraynalı həmkarı Volodimir Zelenski ilə danışıqları uğurlu adlandırıb və mühüm irəliləyiş əldə olunduğunu bəyan edib.
Ağ Ev rəhbəri, həmçinin Avropa liderləri ilə danışıqları dəyərləndirərkən tərəflərin sülh sazişinə xeyli yaxınlaşdığını bildirib.
Zelenski isə öz növbəsində qeyd edib ki, onlar Ukrayna üçün təhlükəsizlik zəmanətlərinin 90%-dən çoxu barədə razılığa gəliblər və daha ətraflı məlumat əldə olunub. O əlavə edib ki, yanvarda Vaşinqtonda ABŞ, Ukrayna və Avropa ölkələri arasında görüş keçirilə bilər.
"20 bənddən ibarət plan 90% razılaşdırılıb, ABŞ-dan təhlükəsizlik zəmanəti 100%, ABŞ və Avropadan təminat 90%, hərbi aspekt 100%, Ukraynanın iqtisadiyyatının bərpası planı yekunlaşmaq üzrədir", - deyə Zelenski bildirib.
Liderlər arasında dünən Floridada keçirilən görüş və onun mümkün nəticələri barədə Crossmedia.az-a danışan türkiyəli politoloq Hüseyn Şeyhanlıoğlunun fikrincə, ABŞ-nin beynəlxalq təhlükəsizlik strategiyası da göstərir ki, bu dövlət Avropada çəkilir və diqqətini daha çox Asiyaya yönəldir: "Əslində nəinki ABŞ, bütün aktorlar, o cümlədən Avropa müharibənin bitməsini istəyir. Amma necə? Əsas məsələ budur. Məsələn, Avropa Rusiya ilə bağlı alçaldıcı məğlubiyyət barədə düşünürsə, ABŞ Rusiyanın müharibədən zəfərlə çıxmasını istəyir. Çünki Vaşinqton Pekinə qarşı mübarizədə Moskvanın onun yanında olmasını arzulayır. Üstəlik, ABŞ istəyir ki, Rusiyanın Çin və Hindistandan asılılığını kəssin".
Ekspert söyləyib ki, bu müharibədə məğlub olan Ukrayna oldu: "Proseslər göstərdi ki, prosesləri idarə edə biləcək gücdə deyil. ABŞ olmadan Avropa bir heçdir. Rusiya isə supergücdür. Proqnozlaşdırmaq olar ki, qurulan yeni dünya nizamında da Rusiyanın öz yeri olacaq".
10:53 29.12.2025
Oxunuş sayı: 2224
