Paşinyan hakimiyyətdən gedir?- Azərbaycanın "B" planı da var, yeni müharibə ehtimalı...
Gələn ilin iyun ayında Ermənistanda keçirilməsi gözlənilən parlament seçkilərinin nəticəsi indidən maraq doğurmağa başlayıb. Çünki seçkilərin nəticəsi təkcə Ermənistanın özü üçün yox, bütün Cənubi Qafqaz üçün əhəmiyyətlidir. Bir çox ekspertin fikrincə, Bakı ilə İrəvan arasında yekun sülh sazişinin imzalanması xeyli dərəcədə bu parlament seçkilərinin nəticəsindən asılıdır. Belə ki, Paşinyandan hakimiyyətdən gedəcəyi, iqtidara başqa siyasətçinin gələcəyi təqdirdə Ermənistanın yenidən destruktiv mövqe ortaya qoyacağı gözləniləndir. Belə bir şəraitdə ən pis ssenari nə ola bilər? Rəsmi Bakının "B" variantları varmı?
Türkiyəli politoloq Hasan Oktay bu barədə Crossmedia.az-a danışıb.
O bildirib ki, Paşinyanın reytinqi 2018-ci ildəki "Məxməri İnqilab" dövrü ilə müqayisədə xeyli aşağı düşüb. Bəzi sorğulara görə, bu reytinq təxminən 13-17%-dir: "Lakin onun seçkilərdə favorit kimi görünməsinin bir neçə əsas səbəbi var. Birincisi, müxalifət hələ də xalqın etimadını qazanmış vahid bir lider ətrafında birləşə bilməyib. Cəmiyyətdə keçmiş prezidentlər Robert Köçəryan və Serj Sarkisyan kimi "köhnə qvardiya" liderlərinə qarşı hələ də güclü mənfi münasibət mövcuddur. Həmçinin Paşinyan özünü müharibənin qarşısını alan və ölkəni daha böyük fəlakətlərdən xilas edən yeganə sülhsevər namizəd kimi təqdim edir. Hakim "Vətəndaş Müqaviləsi" partiyası dövlət aparatını və resurslarını idarə edir. Bu da ona seçki kampaniyasında üstünlük verir".
O bildirib ki, perspektivdə Paşinyanın hakimiyyətdən getməsi həm Ermənistanın daxili, həm də xarici siyasətində kəskin dönüş yarada bilər: "Radikal revanşist qüvvələr hakimiyyətə gələrsə, Paşinyanın tərəfdarları ilə yeni hökumət arasında münaqişələr yarana bilər. Paşinyanın Qərbyönlü siyasəti dayandırıla bilər və Ermənistan tamamilə Rusiyanın orbitinə qayıda bilər. Bu, ABŞ və Avropa İttifaqı ilə münasibətlərin dondurulması deməkdir. Yeni hökumət Azərbaycanla imzalanması gözlənilən sülh müqaviləsindən imtina edə və ya delimitasiya prosesini birtərəfli şəkildə dayandıra bilər".
Müsahibimiz, həmçinin yeni müharibə ehtimalı barədə də danışıb: "Bu, ən çox verilən və kritik sualdır. Ekspertlərin fikrincə, müharibə riski bir neçə halda arta bilər. Bunlardan birincisi revanşist siyasətdir. Əgər yeni hökumət itirilmiş əraziləri hərbi yolla geri almaq və ya Azərbaycanın suverenliyini tanımaqdan imtina etmək kimi radikal bəyanatlar verərsə, bu, Azərbaycanın növbəti əməliyyatlarına səbəb ola bilər. Həmçinin Ermənistanın yeni rəhbərliyi mövcud müqavilələri, o cümlədən sərhəd demarkasiyası ilə bağlı razılaşmanı ləğv edərsə, bu, diplomatik çıxılmaz vəziyyət yaradacaq və hərbi gərginliyi qaçılmaz edəcək. Hazırda Ermənistanda ən böyük qorxu "müharibə tərəfinin" hakimiyyətə gəlməsidir. Lakin Ermənistan ordusunun hazırkı vəziyyəti və regiondakı güc balansı göstərir ki, genişmiqyaslı müharibəyə başlamaq istənilən yeni rəhbərlik üçün intihar olardı.
11:38 26.12.2025
Oxunuş sayı: 1578
