Sosial şəbəkələr vasitəsilə qadınları şantaj edən şəxsi hansı cəza gözləyir?- Açıqlandı
Son illərdə sosial şəbəkələr insanların gündəlik həyatında mühüm rol oynayır və onlar ünsiyyət, məlumat mübadiləsi və maliyyə əməliyyatları üçün geniş istifadə olunur. Lakin bu platformalardan sui-istifadə hallarının artması cəmiyyətdə narahatlıq doğurur. Xüsusilə, qadınların sosial şəbəkələrdə paylaşdıqları fotoşəkillərdən istifadə edilməklə onların şantaj olunması halları ciddi problemə çevrilib.
Bu çərçivədə, "Roman" adı ilə qadınları şantaj etməkdə təqsirləndirilən Yaşar Məmmədovun işi cəmiyyətdə geniş rezonans yaradıb. Bakı Ağır Cinayətlər Məhkəməsində keçirilmiş məhkəmə prosesində Y.Məmmədovun qadınları aldadaraq pul tələb etməsi, saxta profillər yaratmaqla onların şəxsi məlumatlarını yayması və nəticədə azadlıqdan məhrum edilməsi faktları müzakirə olunub.
İntensivləşən oxşar hallarla bağlı hüquqi məsuliyyət barədə Crossmedia.az-a danışan hüquq müdafiəçisi Sahib Məmmədli bildirib ki, bu halda haqqında rüsvayedici məlumatlarn yayımlanması yolu ilə nəsə tələb etmə şantaj adlanır: "Cinayət Məcəlləsinin 182-ci maddəsi məhz bu halları nəzərdə tutur. Maddəyə görə, hədə-qorxu ilə tələb etmə, yəni zərər çəkmiş şəxsin və ya onun yaxınlarının şəxsiyyəti üzərində zor göstərmə, onların haqqında rüsvayedici məlumatlar yaymaq və ya onların əmlakını tələb etmək hədəsi ilə hərəkət etmə cinayət sayılır.
Əgər rüsvayedici məlumatlar yaymaqla pul tələb edilibsə, bu, 182-ci maddəyə əsasən 3 ildən 5 ilədək azadlıqdan məhrum etmə cəzası ilə nəticələnə bilər. Lakin burada ağırlaşdırıcı hallar da mövcuddur: qabaqcadan əlbir olan qrup tərəfindən törədildikdə, təkrar hallarda, zor tətbiq etməklə və ya xeyli miqdarda əmlak əldə etmək məqsədilə həyata keçirildikdə cəza 5 ildən 10 ilədək azadlıqdan məhrum etmə ilə nəzərdə tutulur. Mənim başa düşdüyüm qədərilə, indiki halda 182-ci maddənin 1-ci bəndi tətbiq olunur və təqsir sübut olunarsa, 3 ildən 5 ilədək azadlıqdan məhrum etmə cəzası verilə bilər".
Mehriban Yariyeva
10:12 25.12.2025
Oxunuş sayı: 1792
