İranla İsrail arasında növbəti müharibə gündəmdədir: Bu, 12 günlük savaşa bənzəməyəcək
İranın xarici işlər naziri Abbas Əraqçi "Russia Today"ə verdiyi müsahibədə bildirib ki, ABŞ İranla ədalətli razılaşmaya hazır deyil.
Bu kontekstdə o, Vaşinqtonun həddindən artıq tələblərini və Qərbin İranın ideyalarını rədd etməsini misal gətirib:
"Hər şey onların danışıqların diktələrdən fərqli olduğunu başa düşüb-düşməmələrindən asılıdır. Danışıqlar yolu ilə əldə edilən ədalətli və balanslı bir razılaşmaya hazırıq, amma diktələri qəbul etməyə hazır deyilik. Yaxşı ideyalar təklif etdik, amma hamısı rədd edildi. Bundan sonra belə bir nəticəyə gəldik ki, kifayətdir. Onlar ədalətli bir razılaşmaya hazır deyillər".
İran xarici işlər naziri əlavə edib ki, ABŞ prezidentinin xüsusi nümayəndəsi Stiv Uitkoffla da əlaqələr kəsilib.
"Reallıq budur ki, mən Stiv Uitkoffla əlaqə saxlayırdım və onunla İranın nüvə proqramı ilə bağlı müzakirələr aparırdım, amma bir neçə ay əvvəl bu əlaqələri bitirmək qərarına gəldik. Beş raund danışıqlarımız oldu və hətta altıncı raundu 15 iyuna təyin etdik, amma bundan iki gün əvvəl İsrail bizə hücum etdi və sonra ABŞ da qoşuldu".
Daha əvvəl bildirilmişdi ki, İsrailin Baş naziri Benyamin Netanyahu dekabrın 29-da Floridada ABŞ Prezidenti Donald Tramp ilə İrana təkrar zərbələr endirmək imkanlarını müzakirə edəcək. Bundan qabaq isə "Mossad" rəhbəri David Barnea İranı hələ də nüvə silahı yaratmağa çalışmaqda ittiham etmişdi.
Bütün bunlar belə düşünməyə əsas verir ki, Tehranla Vaşinqton arasında gərginlik davam edir. ABŞ iddialarından əl çəkmir, İran isə geri çəkilmir.
Tərəflər arasında növbəti mümkün müharibə ehtimalı barədə Crossmedia.az-a danışan politoloq Məhəmməd Əsədullazadə söyləyib ki, İranın ballistik raketlərin kütləvi istehsalı və dronların sayını artırması, havadan müdafiə sistemlərini yenidən qurması İsraili preventiv addımlar atmağa məcbur edə bilər: "Həmçinin İran öz hərbi hava qüvvələrinin parkını yeniləyib, yeni qırıcı alırlar. Çin və Rusiya İrana hərbi lojistika imkanlarını genişləndirir. İranın strateji planı Yaxın Şərqdə yeniden geosiyasi mövqelərini möhkəmləndirmək və ABŞ-la danışıqlara getməməkdən ibarətdir. İsrail bunu özünün varlığı üçün təhlükə bildiyi üçün İrana qarşı növbəti hərbi kampaniyaya ABŞ qoşmağa çalışır. Yeni savaş başlayarsa, 12 günlük müharibədən daha da genişmiqyaslı və dağıdıcı ola bilər. Xüsusilə, İsrailin kiçik ərazisi İranın kütləvi raket hücumlarına məruz qalacaq. Həmçinin İran İsrailə öz ərazilərindən müqavimət göstərəcək. İsrail təkbaşına İrana hücumu ağır nəticələrə səbəb olar. Amma, ABŞ müdaxilə edəcəksə, İran hakimiyyətinin taleyi sual altında ola bilər".
14:24 23.12.2025
Oxunuş sayı: 1300
