Dələduzluq halları artır, insanların humanistliyin sui- istifadə olunur- Hüquqşünas danışdı
Sosial şəbəkələrdə müalicəyə ehtiyacı olan uşaqların şəkillərini paylaşaraq dələduzluq etməkdə şübhəli bilinən 30 yaşlı Rəsul Həsənov saxlanılıb.
Bu barədə Kibercinayətkarlıqla Mübarizə Baş İdarəsindən (Kiberpolis) məlumat verilib.
Bildirilib ki, o, xəstə, müalicəyə ehtiyacı olan körpələrin foto və video görüntülərini "Instagram" sosial şəbəkəsində yaratdığı "Zəhra balama yardım", "Körpə balama dəstək", "Əli üçün yardım", "Yusif serebral iflic" və s. səhifələrdə paylaşaraq təcili yardım edilməzsə, körpələrin həyatı üçün təhlükə yarana biləcəyini qeyd edib.
R.Həsənov yardımların köçürülməsi üçün istifadəsində olan bank kartlarını da həmin paylaşımların üzərində yerləşdirib. Ağır xəstəliyi olan uşaqların görüntüləri, emosional musiqi və mətnlərdən təsirlənən vətəndaşlar isə qeyd edilən kartlara 1 manatdan 500 manata qədər, ümumilikdə isə 200 min manata yaxın pul köçürüblər. Saxlanılan şəxs həmin pulları nağdlaşdıraraq şəkillərini paylaşdığı uşaqların ailələrinə yox, öz şəxsi ehtiyaclarına xərcləyib.
R.Həsənovdan iş üzrə əhəmiyyət kəsb edən məlumat və elektron sübutlar aşkar olunaraq götürülüb.
Faktla bağlı araşdırma aparılır.
Bu hadisə insanların yaxşı niyyətindən sui-istifadənin nə qədər asan ola biləcəyini göstərir. Belə hallarda yardımı birbaşa etibarlı qurumlar vasitəsilə etmək vacibdir. Eyni zamanda, sosial şəbəkələrdə yayılan məlumatlara qarşı diqqətli olmaq lazımdır.
Məsələ ilə bağlı hüquqşünas Daşqın Qənbərov Crossmedia.az- a açıqlama verib.
O bildirib ki, cinayətkar qruplar müxtəlif üsul və vasitələrdən istifadə edərək, o cümlədən xəstə uşaqların şəkillərini paylaşmaqla insanların etibarından sui-istifadə edir və bu yolla dələduzluq cinayətləri törədirlər: "Məsələ ilə bağlı qısa və konkret olaraq onu deyə bilərəm ki, hazırda cinayətkarlar və cinayətkar birliklər öz cinayət məqsədlərinə çatmaq üçün ən müxtəlif vasitələrdən istifadə edirlər. Qeyd etdiyiniz hal faktiki olaraq dələduzluq cinayətlərinin bir növüdür. Bildirim ki, bu dələduzluq cinayətlərinin ümumilikdə çox müxtəlif, rəngarəng formaları mövcuddur. Məsələn, kimisə işə düzəltmək adı ilə aldadaraq pulunu və ya əmlakını ələ keçirirlər, kiminsə problemini həll etmək, yaxud hər hansı bir sənədi düzəltmək adı ilə müxtəlif üsul və vasitələrdən istifadə edərək insanların etibarını qazanır və onları aldatmaq yolu ilə əmlaklarını ələ keçirirlər. Bu isə Azərbaycan Respublikasının Cinayət Məcəlləsinin 178-ci maddəsi ilə təqib olunan cinayət əməlidir. Həmin maddədə əsasən iki elementə diqqət çəkilir: birincisi şəxsi aldatmaq, ikincisi isə şəxsin etibarından sui-istifadə etmək, yəni şəxsi aldatmaq və onun etibarından sui-istifadə etməklə əmlakını ələ keçirmək cinayət əməli hesab olunur. Dediyim kimi, bu cinayətlər ən müxtəlif üsul və vasitələrlə həyata keçirilir. Cinayətkarlar məqsədlərinə çatmaq üçün bu sahədə davamlı olaraq yeni üsullar tətbiq edirlər. Çox təəssüf ki, bəzən vətəndaşlar da onların toruna düşürlər. Hazırda müxtəlif uşaqların şəkillərini paylaşaraq, guya xəstəlik və müalicəyə ehtiyac bəhanəsi ilə insanların əmlakını aldadaraq ələ keçirmə halları mövcuddur. Hesab edirəm ki, bu da xalqımızın həssas humanist və insanpərvər duyğularının cinayətkar qruplar tərəfindən istismar edilməsi kimi qiymətləndirilə bilər".
Ülvi Zahidov
12:44 16.12.2025
Oxunuş sayı: 2599
