Məhkəmə və hüquq

Onlayn qumar şəbəkəsi üzrə mütəşəkkil dəstənin məhkəməsi başlanıb

Onlayn qumar oyunlarının təşkili, bu fəaliyyətlərdən əldə edilmiş vəsaitlərin leqallaşdırılması ilə bağlı ittiham olunan Yusif Baqiyev, Ramil Saadov, Samir Nəsibovun cinayət işi üzrə məhkəmənin hazırlıq iclası keçirilib.

Crossmedia.az xəbər verir ki, bu gün Bakı Ağır Cinayətlər Məhkəməsində hakim Fəxri Məmmədovun sədrliyi ilə keçirilən prosesdə anket məlumatları dəqiqləşdirilib.

Yusif Baqiyevin vəkili Hikmət Əliyev vəsatət verərək cinayət işinə xitam verilməsini xahiş edib. Digər vəkillər də vəsatətlərinin olduğunu bildiriblər.

Proses vəsatətlərə baxılması məqsədilə dekabrın 2-dək təxirə salınıb.

Qeyd edək ki, Baş Prokurorluğun Mətbuat xidmətinin yaydığı məlumata görə, Korrupsiyaya qarşı Mübarizə Baş İdarəsində internet informasiya resurslarından istifadə etməklə qumar oyunlarının təşkil edilməsi və əlaqəli qanunsuz əməllər barədə daxil olmuş məlumatlar əsasında həyata keçirilən əməliyyat-axtarış tədbirləri nəticəsində başlanmış cinayət işi üzrə ibtidai istintaq mütəşəkkil dəstənin bir sıra üzvləri barəsində tamamlanıb.