İnam Kərimov: Artıq məhkəmələr yalnız qərar çıxaran deyil, həm də etimad doğuran institutlara çevrilib
Artıq məhkəmələr yalnız qərar çıxaran deyil, həm də etimad doğuran institutlara çevrilib.
Crossmedia.az xəbər verir ki, bunu Ali Məhkəmənin sədri İnam Kərimov Beynəlxalq Hakimlər Assosiasiyasının Azərbaycan Hakimlər İttifaqı ilə əməkdaşlığı çərçivəsində keçirilən "Məhkəmə hakimiyyəti ilə dövlətin digər iki hakimiyyət qolu arasında əlaqələr" mövzusunda beynəlxalq konfransda deyib.
Onun sözlərinə görə, məhkəmə müstəqilliyi imtiyaz deyil, məsuliyyətdir:
"Məhkəmə hakimiyyətinin məqsədi qanunu ədalətlə, qorxu və ya üstünlük olmadan tətbiq etmək, eyni zamanda, icraedici və qanunverici hakimiyyətlə qarşılıqlı hörmətə əsaslanan konstruktiv dialoqu qorumaqdır".
İ.Kərimov bildirib ki, hakimiyyət bölgüsü təkcə institutlarla bağlı deyil, həm də fərdlərlə bağlıdır:
"Hər bir institutun arxasında onu idarə edən insanlar dayanır. İnstitutların dürüstlüyü onları idarə edən və orada xidmət edən şəxslərin dürüstlüyündən doğur. Heç bir sistem əgər onu həyata keçirənlər mənəvi güc və vicdanı əsas götürmürsə, uzunömürlü ola bilməz.
Məhkəmə müstəqilliyi bir imtiyaz deyil, bu, məsuliyyətdir. Bu mexanizm vətəndaşları özbaşınalıqdan qoruyur, hər kəsin qanun qarşısında məsuliyyət daşımasını təmin edir və qanunun ədalətə sadiq qalmasına zəmanət verir. Eyni zamanda, bu məsuliyyət məhkəmə hakimini vicdanına və peşə etikasına bağlayır. Bundan əlavə, bu, qərəzsizlikdən, yəni ağıl və məntiqi kölgələyən emosiyalardan, simpatiya və antipatiyadan uzaq qərar vermək qabiliyyətini tələb edir".
Ali Məhkəmə vurğulayıb ki, məhz buna görə də məhkəmə hakimiyyətinin gücü təkcə qanunlarla və institutlarla deyil, həm də bu sistemdə xidmət edənlərin xarakteri və məsuliyyət hissi ilə ölçülür:
"Çünki məhkəmə müstəqilliyi məhkəmə zalında başlamır, o, hakimin daxili dürüstlüyü və mənəvi inamından başlanır.
İ.Kərimov hesab edir ki, Azərbaycan bu yolda mühüm irəliləyişlər əldə edib:
"Prezident İlham Əliyevin – məhkəmə müstəqilliyinin konstitusion təminatçısının – rəhbərliyi ilə məhkəmə sistemi dərin və davamlı islahatlardan keçib. Bu islahatlar məhkəmələri qanunun keşikçisi və ədalətin son hökm verəni kimi möhkəmləndirib. Artıq məhkəmələr yalnız qərar çıxaran orqanlar deyil, həm də etimad doğuran institutlara çevrilib".
09:42 14.10.2025
Oxunuş sayı: 965
