Hakimliyə yeni seçim qaydaları təsdiqləndi
Məlum olduğu kimi, 2024-cü il 7 noyabr tarixdə “Məhkəmələr və hakimlər haqqında” Qanuna edilmiş dəyişikliyə əsasən hakimliyə namizədlərin seçim prosesinin sayı 4-dən 3-ə endirilmişdir. Edilmiş dəyişikliyə əsasən namizədlərin seçimi test imtahanı, yazılı imtahan və müsahibə əsasında aparılacaq.
Crossmedia.az xəbər verir ki, bu barədə Məhkəmə-Hüquq Şurası məlumat yayıb.
Məlumata görə yeni qaydalara əsasən, test
tapşırıqlarının 90-ı namizədin müvafiq qanunvericilik sahələri üzrə biliklərini,
10-u isə məntiqi nəticələr çıxarmaq qabiliyyətini müəyyən etmək məqsədi
daşıyır.
Həmçinin yazılı imtahan mərhələsində hər bir sahə üzrə
kazusun cavabı ən çoxu 100 bal ilə qiymətləndirilir. Namizədin həm cinayət
hüquqi, həm də mülki hüquqi sahələr üzrə topladığı ballar cəmlənir və 2-yə
bölünərək, yekun bal müəyyən edilir.
Topladığı yekun bal 60 və ya daha çox olan namizəd yazılı
imtahandan keçmiş hesab edilir, bu şərtlə ki, onun hər sahə üzrə ayrı-ayrılıqda
topladığı ballar 40-dan az olmasın.
Yeni dəyişikliklərə əsasən, namizəd şəxsiyyət vəsiqəsinin
sürətini Elektron Hökumət İnformasiya Sistemi üzərindən, əmək müqavilələrinə
dair çıxarışı isə (Əmək Məcəlləsinin 7-ci maddəsinin 2-1-ci hissəsində müəyyən
edilmiş, eləcə də 2014-cü il iyulun 1-dək əmək müqavilələrinə xitam verilmiş şəxslər
istisna olmaqla) Azərbaycan Respublikası Əmək və Əhalinin Sosial Müdafiəsi
Nazirliyinin Mərkəzləşdirilmiş elektron informasiya sisteminin “Əmək və məşğulluq”
altsistemindən əldə etməklə təqdim edəcək.
“Vakant hakim vəzifələrinə namizədlərin seçilməsi
Qaydaları”na edilmiş müvafiq dəyişikliklərin tam mətni ilə https://e-qanun.az/framework/60373 keçidi vasitəsilə tanış olmaq mümkündür.
22:12 15.08.2025
Oxunuş sayı: 8939
