Çində Azərbaycan gənclərinin iştirakı ilə sahibkarlıq məsələləri müzakirə edilib
Çində keçirilən Dünya Gənclər İnkişaf Forumu çərçivəsində yaşıl inkişaf, elm, texnika və innovasiya, mədəniyyət və irsin qorunması mövzularında tematik sessiyalar təşkil olunub.
Crossmedia.az xəbər verir ki, tədbir çərçivəsində Azərbaycan Respublikası Diasporla İş üzrə Dövlət Komitəsinin dəstəyi ilə “İpək Yolu Gənc Sahibkarlar” Forumu keçirilib. Forumda Afrika, Asiya və Avropanın 35 ölkəsindən 37 gənc iştirak edib. Tədbir tematik sessiyalar əsasında təşkil olunub.
Forumun açılışında çıxış edən Çin Gənclər Federasiyasının Baş katibinin müavini Liu Kay sahibkarlar və gənclər arasında əməkdaşlığın əhəmiyyətindən, “Böyük İpək Yolu” Beynəlxalq Gənclər İttifaqı ilə uzunmüddətli əməkdaşlıq sayəsində əldə edilən uğurlardan, “Kəmər və Yol” təşəbbüsü çərçivəsində görülən işlərdən danışıb.
“Böyük İpək Yolu” Beynəlxalq Gənclər İttifaqının prezidenti Aytən Əliyeva Forumun əsas məqsədinin İpək Yolu coğrafiyasında yerləşən ölkələrdən olan gəncləri bir araya gətirərək, gənc sahibkarlar şəbəkəsinin yaradılması olduğunu bildirib.
Forumun “Gənclərin səsi: İpək Yolu innovatorları”, “Gənclərin cavabı: qlobal çağırışlar və dayanıqlı inkişaf məqsədləri gündəliyi”, “Gənclərin gücü: dəyişən dünyada innovasiya və sahibkarlıq” və digər panel iclaslarında müxtəlif ölkələrdən olan gənc liderlər və iş adamları təqdimatlarla çıxış edib, müzakirələr aparılıb.
Sonda iştirakçılara sertifikat təqdim edilib.
Forum iştirakçılarının Çinin Şanxay, Çanşa və Sian şəhərlərinə işgüzar səfərləri təşkil edilib.
18:55 22.07.2025
Oxunuş sayı: 10786
