Azərbaycanda üç minə yaxın vəkil var
“Konstitusiya və Suverenlik İli” çərçivəsində “Badamdar” mehmanxanasında Azərbaycan Respublikası Vəkillər Kollegiyası (VK) Rəyasət Heyətinin geniştərkibli iclası və vəkilliyə namizədlərin təntənəli andiçmə mərasimi keçirilib.
Crossmedia.az bildirir ki, tədbirdə VK Rəyasət Heyətinin üzvləri, vəkil qurumlarının rəhbərləri, eləcə də kütləvi informasiya vasitələrinin nümayəndələri iştirak ediblər.
Mərasimdən əvvəl vəkilliyə namizədlər Fəxri xiyabanı ziyarət edərək Ümummilli Lider Heydər Əliyevin məzarı önünə gül qoyub, əziz xatirəsini dərin ehtiramla yad ediblər.
Tədbir Azərbaycan Respublikasının Dövlət Himni və Vəkil Marşının səsləndirilməsi ilə başlayıb. Ulu Öndər Heydər Əliyevin və Azərbaycanın müstəqilliyi, ərazi bütövlüyü uğrunda şəhid olmuş qəhrəmanların xatirəsi bir dəqiqəlik sükutla anılıb.
Açılış nitqi ilə çıxış edən Vəkillər Kollegiyasının sədri Anar Bağırov qarşıdan gələn Milli Mətbuat Günü münasibətilə media nümayəndələrini təbrik edərək onların hüquqi maarifləndirmə sahəsində rolunu yüksək qiymətləndirib. O, vəkillik institutunun tarixi inkişafından, son illərdə aparılan islahatlardan və regionlarda hüquqi yardımın əlçatanlığının artırılmasından danışıb.
Sədr, həmçinin, Ulu Öndər Heydər Əliyevin 1999-cu ildə imzaladığı “Vəkillər və vəkillik fəaliyyəti haqqında” Qanunun əhəmiyyətini vurğulayıb. Anar Bağırov bildirib ki, Prezident İlham Əliyevin 2018-ci il tarixli sərəncamı ilə vəkilliyin inkişafına yönəlmiş tədbirlər mühüm dəyişikliklərə səbəb olub.
O, çıxışında həmçinin məhkəmə-hüquq sahəsində həyata keçirilən islahatlardan, şəffaf hakim seçimi və yüksək ixtisaslı kadrların məhkəmə sisteminə cəlb edilməsindən bəhs edib. 3 iyun 2025-ci il tarixli sərəncama əsasən yeni təyin olunmuş 9 hakimin Kollegiya üzvü olması da yüksək göstərici kimi qiymətləndirilib.
Anar Bağırov bildirib ki, 2018-ci ildən bu günə qədər keçirilən 15 test imtahanında 6480 nəfər iştirak edib, 1912 namizəd icbari təlimi tamamlayaraq Kollegiyanın üzvü olub. Bugünkü tədbirdə isə daha 77 yeni namizəd and içərək Kollegiyaya üzv qəbul olunub. Onlardan 59-u kişi, 18-i qadındır; 7 nəfəri regionlarda, 70 nəfəri isə paytaxtda fəaliyyət göstərəcək. Beləliklə, ümumi vəkil sayı 2770-ə, qadın vəkillərin sayı isə 595-ə çatıb (17%).
Mərasimdə Kollegiyanın fəaliyyəti ilə bağlı videoçarx nümayiş olunub, hakim vəzifəsinə təyin olunan keçmiş vəkillər Fəxri Fərmanla təltif olunublar.
Sonda namizədlər Dövlət Bayrağı önündə təntənəli şəkildə and içərək, vəkil peşəsini şərəflə və məsuliyyətlə daşımağa söz veriblər. Onlara vəkil vəsiqələri təqdim olunub. Yeni qəbul olunmuş vəkillər çıxış edərək Vəkillər Kollegiyasına təşəkkürlərini bildiriblər.
Mərasimin ikinci hissəsində isə fəaliyyətində fərqlənən və yubiley yaşı tamam olan bir sıra vəkillər təltif olunub, həmçinin VK Rəyasət Heyətinin iclası keçirilib və gündəlikdəki məsələlər müzakirə olunaraq müvafiq qərarlar qəbul edilib.
Mehriban Yariyeva
17:41 18.07.2025
Oxunuş sayı: 1195
