Pekin Azərbaycan məhsullarının Çin elektron ticarət platformalarında təşviqini dəstəkləyir
Pekin Azərbaycanın öz məhsullarını Çin bazarında təşviq etmək üçün ölkənin elektron ticarət platformalarından istifadə səylərini dəstəkləyir və platforma iqtisadiyyatı sahəsində qabaqcıl təcrübəsini bölüşməyə hazırdır.
Crossmedia.az xəbər verir ki, bunu Çinin Bakıdakı səfiri Lu Mey bu gün keçirdiyi mətbuat konfransında bildirib.
Diplomatın sözlərinə görə, Çin növbəti beş il ərzində 300-dən çox mühüm islahat həyata keçirməyi planlaşdırır və yüksək keyfiyyətli inkişafa mane olan institusional maneələrin aradan qaldırılmasına diqqət yetirəcək. İnformasiya texnologiyaları, rəqəmsal iqtisadiyyat, süni intellekt və təmiz enerji daxil olmaqla, məhsuldarlığın yeni istiqamətlərinin inkişafına xüsusi diqqət yönəldiləcək.
"Çin təcrid olunmuş modernləşməyə can atmır. Biz qlobal modernləşməni təşviq etmək üçün inkişaf etməkdə olan ölkələr də daxil olmaqla bütün ölkələrlə birlikdə işləməyə hazırıq. Çində “Huawei”, “Alibaba”, “BYD” və “DeepSeek” kimi dünyanın aparıcı şirkətləri fəaliyyət göstərir. Çin rəqəmsal fərqin aradan qaldırılmasına və innovativ inkişafa töhfə vermək üçün Azərbaycanla əlaqəli sahələrdə əməkdaşlığı genişləndirməyə hazırdır", - L.Mey vurğulayıb.
O, həmçinin qeyd edib ki, Azərbaycan Prezidenti İlham Əliyevin Pekinə səfəri zamanı tərəflər rəqəmsal iqtisadiyyat, sənaye, aerokosmik sənaye və digər sahələrdə əməkdaşlıq haqqında bir sıra sənədlər imzalayıblar. "Bu, ölkələrimiz arasında daha çox innovasiyaya yol açacaq və praqmatik əməkdaşlıq üçün yeni imkanlar yaradacaq", - səfir əlavə edib.
L.Mey vurğulayıb ki, Çin Prezident İlham Əliyevin təklif etdiyi inkişaf və dirçəliş strategiyasını dəstəkləyir və Azərbaycanın sosial inkişafına və vətəndaşlarının həyat keyfiyyətinin yaxşılaşdırılmasına töhfə vermək niyyətindədir.
18:20 28.04.2025
Oxunuş sayı: 844
