Məmməd Musayev: "Türkdilli ölkələr qlobal ÜDM-də 1,7 % paya malikdir"
2024-cü ildə Türk Dövlətləri Təşkilatına (TDT) üzv ölkələrin istehsal etdiyi ümumi daxili məhsulun (ÜDM) məcmu dəyəri 900 milyard ABŞ dollarından çox olub ki, bu da qlobal ÜDM-in 1,7 %- deməkdir.
Crossmedia.az xəbər verir ki, bunu Sahibkarlar (İşəgötürənlər) Təşkilatları Milli Konfederasiyasının, eyni zamanda Türk Ticarət və Sənaye Palataları Birliyinin prezidenti Məmməd Musayev Bakıda keçirilən “Türk İnvestisiya Fondu və Türk Ticarət və Sənaye Palataları Birliyi (TCCI): Biznes Liderləri üçün Məlumatlandırma Görüşü və B2B” adlı tədbində bildirib.
Onun sözlərinə görə, ötən il türk dövlətlərinin ümumi iqtisadi artımı 6 % olub ki, bu da qlobal iqtisadi artımı (Dünya Bankı bu göstəricinin 2,7 % olduğunu ehtimal edir) təxminən 2 dəfə üstələyib: "Bu rəqəmlər türk dövlətlərinin davamlı gücləndiyini əyani surətdə sübut edir. Konfederasiyanın türk dövlətlərindəki nümayəndələri də bu tədbirdə iştirak edir və növbəti görüşlərimizin digər üzv ölkələrində keçirilməsi nəzərdə tutulur".
M.Musayev vurğulayıb ki, bu platforma türk dövlətlərinin iş dünyasının bir-birini daha yaxından tanımasına xidmət edəcək: "İnanırıq ki, bu ilin sonuna doğru Türk İnvestisiya Fondunun təsdiq etdiyi ilkin layihələri sizinlə bölüşmək fürsətimiz olacaq. Biz Konfederasiya olaraq türk dövlətlərini təmsil edən qurumlar və iş adamları ilə əməkdaşlığın genişləndirilməsi üçün öhdəmizə düşən vəzifələri yerinə yetirəcək, yaradılan əlverişli şəraitdən səmərəli şəkildə və düzgün istifadə edərək türk dünyasının iqtisadi qüdrətinin artması üçün bütün qüvvəmizi səfərbər edəcəyik".
13:46 14.02.2025
Oxunuş sayı: 3796
