Hüquqşünas partiya sədrinə qarşı - Narkotikin açıq şəkildə satılması təklifi fikirləri haçaladı
Ümid Partiyasının sədri İqbal Ağazadə müsahibəsində Azərbaycanda qanunla 1 qrama qədər narkotik vasitənin daşınmasına və istifadəsinə icazə verildiyini bildirərək qeyd edib ki, narkomanlara vəsiqə verilsin və satışı açıq elan edilsin. Bu açıqlama narkotik vasitələrin qanuni dövriyyəsi və məsuliyyət məsələsini yenidən gündəmə gətirib. Daha sonra Azərbaycan Demokrat Partiyasının sədri Sərdar Cəlaloğlu da məsələyə münasibət bildirərək dəstək çıxdığını qeyd edib. Və xarici dövlətlərdə də eyni təcrübənin olduğunu misal çəkib.
Hüquqşünas Ramil Süleymanov Crossmedia.az-a açıqlamasında bildirib ki, hər hansı məsələ ilə bağlı qanunvericilik təşəbbüsü irəli sürmək konstitusion hüquqdur: “Bunun üçün qanunvericilikdə nəzərdə tutulan qaydalara əməl edilməli və təşəbbüs Milli Məclisin müzakirəsinə təqdim olunmalıdır: “Əgər hər hansı bir məsələ ilə bağlı qanunvericilik təşəbbüsü irəli sürmək istəyirlərsə, bu, konstitusion hüquqdur və mütləq qaydada 40 min nəfərin imzasını toplamaqla qanunvericilik təşəbbüsü ilə çıxış edib aktı Milli Məclisə təqdim edə bilərlər. Milli Məclis müzakirə zamanı həmin qanunvericilik təşəbbüsünü məqbul hesab edərsə, nəticə etibarilə həmin qanun qüvvəyə minər və Prezident tərəfindən də imzalandıqdan sonra qanuni qüvvəsini almış olar və tətbiq edilər. Ümumiyyətlə, Konstitusiyada qanunvericilik təşəbbüsü kimi 40 min imza ilə təşəbbüs göstərilməsi haqqında maddə var. Lakin həmin 40 min imzanın toplanması, təqdim olunması və digər prosedurlarla bağlı mexanizm qanunvericilikdə nəzərdə tutulmayıb”.
Hüquqşünas qeyd edib ki, narkotik vasitələrin qanunsuz istehsalı, daşınması və istifadəsi qanunvericiliklə qadağandır və cinayət əməli hesab olunur: “Azərbaycan Respublikasının qanunvericiliyinə görə, əməlində nəzərdə tutulmuş müvafiq miqdardan asılı olaraq—xeyli, külli və ya xüsusilə külli miqdarda narkotik vasitələrin qanunsuz dövriyyəsinə görə mütənasib cəza tədbirləri nəzərdə tutulur. Nazirlər Kabineti tərəfindən təsdiq edilmiş siyahıya əsasən, narkotik vasitələrin türünə və miqdarına görə onların qanunsuz dövriyyəsi ilə bağlı müvafiq kriteriyalar və hüquqi müddəalar müəyyən olunmuşdur”.
R.Süleymanov hesab edir ki, hazırda daha ciddi problemlərin olduğu bir vaxtda partiya sədrlərinin bu cür bəyanatlar verməsi və təşəbbüslər irəli sürməsi müsbət qarşılanmır: “İndiki halda daha ciddi problemlərin qaldığı bir vəziyyətdə partiya sədrlərinin belə bəyanatlar verməsi, belə təşəbbüslər ortaya qoyması absurddur. Bu, cəmiyyətdə ciddi müzakirəyə və o cümlədən qınağa səbəb ola bilən bir məsələdir. Ona görə də partiya sədrləri bir zəhmət ölkənin siyasi vəziyyəti ilə məşğul olsunlar və bununla bağlı öz təkliflərini versinlər. Zaman-zaman ölkə başçısı tərəfindən müəyyən əməllərin dekriminallaşdırılması ilə bağlı qanunlar, sərəncamlar imzalanır və qanunlara dəyişikliklər edilir. Hesab edirəm ki, bu məsələ ilə hüquqşünaslar və vəkillər məşğul olsalar, daha yaxşı olar”.
Zərnigar Hüseynli
12:30 14.08.2026
Oxunuş sayı: 57
