Marketdən bu dondurmaları qəti almayın - Zəhərlənə bilərsiniz
Yay mövsümündə havaların temperaturunun yüksəlməsi ilə dondurmaya tələbat da artır. Marketlərdə müxtəlif çeşiddə dondurmalar soyuducu vitrinlərdə satışa çıxarılır. Lakin məhsulun keyfiyyətinin və qida təhlükəsizliyinin qorunması üçün onun yalnız soyuq yerdə saxlanılması kifayət deyil.
Qida eksperti Fərid Səfərov Crossmedia.az-a açıqlamasında bildirib ki, yay aylarında dondurmanın təhlükəsizliyi üçün onun fasiləsiz şəkildə uyğun temperaturda saxlanılması vacibdir:
“Marketlərdə dondurmalar xüsusi dondurucu vitrinlərdə, istehsalçının müəyyən etdiyi temperatur rejimində, adətən -18°C və daha aşağı temperaturda saxlanılmalıdır. Vitrinin temperaturu sabit olmalı, məhsulların əriməsinə və sonradan yenidən dondurulmasına imkan verilməməlidir. Dondurucu vitrin həddindən artıq doldurulmamalı və məhsulların soyuq hava dövranına maneə yaradılmamalıdır”.
F.Səfərov qeyd edib ki, istehlakçı ilk növbədə qablaşdırmanın vəziyyətinə diqqət etməlidir:
“Qablaşdırma şişmiş, cırılmış, açılmış və ya üzərində buz kristalları həddindən artıq əmələ gəlmişdirsə, bu, məhsulun düzgün saxlanılmaması və temperatur rejiminin pozulması ilə bağlı ola bilər. Dondurma çox yumşaqdırsa, formasını itiribsə və ya qablaşdırmanın içərisində ərimə-donma izləri görünürsə, həmin məhsulu almaq məsləhət deyil. Həmçinin son istifadə tarixi, qablaşdırmanın bütövlüyü və məhsulun saxlanma temperaturu yoxlanılmalıdır. Əsas məqam odur ki, dondurma yalnız “soyuq” yerdə deyil, sabit və tələb olunan dondurma temperaturunda saxlanılmalıdır. İstehlakçıda məhsulun əridiyi və yenidən dondurulduğu ilə bağlı şübhə yaranarsa, riskə getməmək daha doğrudur”.
Zərnigar Hüseynli
10:30 14.08.2026
Oxunuş sayı: 47
