Ekspert: “Bu istiqamətdə atılan addımlar təhsilin keyfiyyətinin təmin olunmasına xidmət edir”
Bağçada çalışan təhsilverənlərin sertifikatlaşdırma prosesində edilən dəyişikliklər, məktəbəqədər təhsilin keyfiyyətini artırmaq və müəllimlərin peşəkar inkişafını təmin etmək məqsədi güdür. Bu dəyişikliklər, təhsilverənlərin bilik və bacarıqlarının qiymətləndirilməsi və inkişaf etdirilməsi üçün əhəmiyyətli bir addım kimi çıxış edir. Yeni sertifikatlaşdırma qaydaları, müəllimlərin peşəkar bacarıqlarını artırmağa və məktəbəqədər təhsilin səviyyəsini yüksəltməyə xidmət edir. Lakin bu dəyişikliklərin tətbiqi zamanı müəyyən çətinliklər və problemlər də yarana bilər.
Mövzu ilə bağlı Crossmedia.az-a açıqlama verən təhsil eksperti İlqar Orucov bildirib ki, təhsil verənlərin sertifikatlaşdırılması qaydasında edilən dəyişikliklər, məktəbdənkənar təhsil sahəsində keyfiyyətin artırılmasına yönəlmiş bir addımdır.
O vurğulayıb ki, bununla yanaşı, son zamanlar məktəbəqədər təhsil müəssisələrində daha çox yeni peşəkarların işə qəbul olunduğunun şahidi olmuşuq. Lakin bəzi hallarda bu müəssisələrdə xoşagəlməz vəziyyətlərin yaranması da mümkündür ki, bu da əsasən səriştəsiz kadrların işə cəlb olunması ilə bağlıdır.
“Düşünürəm ki, Elm və Təhsil Nazirliyinin yeni yanaşması məktəbəqədər təhsil müəssisələrində keyfiyyətin artırılmasına yönəlmişdir. Bu istiqamətdə atılan addımlar təhsilin keyfiyyətinin təmin olunmasına xidmət edir. Təhsil verənlərin sertifikatlaşdırılması isə bu prosesin əsas hissəsidir. Hesab edirəm ki, bu yanaşma həmçinin bilik, bacarıq və təcrübəyə malik olmayan şəxslərin işdən uzaqlaşdırılmasını təmin edəcək. Bu isə öz növbəsində məktəbəqədər təhsil müəssisələrinin keyfiyyət göstəricilərinin yüksəlməsinə səbəb olacaq”,–deyə İlqar Orucov deyib.
Ekspertin fikrincə, eyni zamanda, bu tədbirlər əməkhaqqı ilə bağlı diferensial yanaşmanın tətbiqini də nəzərdə tutur ki, bu da vacib bir faktordur:
“Mən əminəm ki, sertifikatlaşdırma tədbirləri nəticəsində məktəbəqədər təhsil müəssisələrində yeni nəfəs, yeni mühit formalaşacaq. Şübhəsiz ki, təhsilin son nəticələri keyfiyyətli biliklərdən asılıdır və keyfiyyətli bilik yalnız peşəkar kadrların iştirakı ilə mümkündür”.
Həmçinin qeyd edib ki, bu baxımdan, təhsilin bütün mərhələlərində keyfiyyətli nəticələr əldə etmək üçün təhsilə ayrılan diqqət və resursların artırılması vacibdir. Həm dövlət, həm də cəmiyyət bu prosesdə birgə iştirak etməli və təhsilin inkişafına dəstək verməlidir.
Gültac Mehdizadə
16:44 26.12.2024
Oxunuş sayı: 8447
