TİKA koordinatoru: "Kalkınma Elçiləri" layihəsinə Azərbaycandan başlamamız təsadüfi deyil
Türk İşbirliyi və Koordinasiya Agentliyinin (TİKA) həyata keçirdiyi "Kalkınma Elçiləri" layihəsinin ilk mərhələsinə Azərbaycandan start verilməsi təsadüfi seçim deyil.
1918-ci ildə Nuru Paşanın komandanlığı altında Qafqaz İslam Ordusunun Azərbaycanın azadlığı uğrunda göstərdiyi tarixi xidmətlərə ehtiram əlaməti olaraq layihənin ilk mərhələsi məhz Azərbaycanda təşkil olunub. Crossmedia.az-a açıqlama verən TİKA Bakı Proqram Koordinatoru Mahmut Ağırman bildirib ki, məqsəd gənclərin babalarının izi ilə Azərbaycana gəlməsini təmin etmək olub:
"Türkiyənin müxtəlif universitetlərində və dünyanın fərqli ölkələrində təhsil alan gənclərin iştirak etdiyi 'Kalkınma Elçiləri' layihəsinin ilk mərhələsini Azərbaycanda başladıq. Bunun əsas səbəbi 1918-ci ildə Nuru Paşanın komandanlığı altında Qafqaz İslam Ordusunun Azərbaycanın azadlığı uğrunda göstərdiyi tarixi xidmətlərə ehtiramın ifadəsidir. Gənclərimizin də babalarının izi ilə Azərbaycana gəlməsini istədik".
Mahmut Ağırman qeyd edib ki, layihə çərçivəsində iştirakçılar Azərbaycanın müxtəlif bölgələrində TİKA-nın həyata keçirdiyi layihələrlə yaxından tanış olublar:
"Gənclər Bakı, Gəncə, Şamaxı, Lənkəran, Quba və digər bölgələrdə oldular. Onlar TİKA-nın səhiyyə, təhsil, kənd təsərrüfatı və digər sahələrdə həyata keçirdiyi layihələri yerində gördülər və bu fəaliyyətlərlə yaxından tanış oldular".
Koordinator vurğulayıb ki, səhiyyə və təhsil sahəsində həyata keçirilən layihələr iştirakçılarda xüsusi maraq doğurub:
"Universitetlərdə və xəstəxanalarda yaradılan imkanlar, tibbi laboratoriyalar, təcili tibbi yardım avtomobilləri, həmçinin Türkiyə və Azərbaycan mütəxəssislərinin birgə fəaliyyəti iştirakçılar tərəfindən böyük maraqla qarşılandı. Eyni zamanda Türk Anadolu Liseyi, Atatürk Liseyi və digər təhsil müəssisələri də ziyarət olundu".
O bildirib ki, layihə çərçivəsində Türkiyənin Azərbaycandakı qurumlarının fəaliyyəti ilə də tanışlıq təşkil edilib:
"İştirakçılar TRT, Anadolu Agentliyi, Maarif Vəqfi, Yunus Əmrə İnstitutu və digər qurumlarda oldular. Bundan əlavə, kənd təsərrüfatı sahəsində, xüsusilə arıçılıq, tingçilik və yaşıllaşdırma layihələri ilə bağlı görülən işləri də yerində müşahidə etdilər".
Mahmut Ağırman əlavə edib ki, proqramın ən yaddaqalan hissələrindən biri Qafqaz İslam Ordusunun şəhidlərinin xatirəsinə ehtiramın ifadə olunması olub:
"Gənclər Qafqaz İslam Ordusunun şəhidliyini, Nuru Paşanın muzey evini və TİKA-nın dəstək verdiyi müxtəlif obyektləri ziyarət etdilər. Səfərin sonunda şəhidlərin ruhuna dualar oxuyaraq Türkiyəyə yola düşürlər".
Koordinator sonda Azərbaycanın inkişafını yüksək qiymətləndirib və iki ölkə arasındakı əməkdaşlığın əhəmiyyətini vurğulayıb:
"Azərbaycan çox təmiz və sürətlə inkişaf edən ölkədir. Hər gəlişimdə bunun şahidi oluram. Enerji, təbii qaz və digər sahələrdə Azərbaycan ilə Türkiyə arasında əməkdaşlıq uğurla davam edir. 'İki dövlət, bir millət' prinsipi bu gün də bütün sahələrdə özünü göstərir. Azərbaycan dövlətinə və xalqına göstərdikləri qonaqpərvərliyə görə səmimi təşəkkürümü bildirirəm".
Nigar Xəlilli
11:27 30.07.2026
Oxunuş sayı: 134
