"Müstəqilliyə Aparan Yol: Heydər Əliyev İrsi" Adlı Tədbir Keçirilib
Azərbaycan Respublikası Elm və Təhsil Nazirliyinin (AR ETN) akademik Həsən Əliyev adına Coğrafiya İnstitutunda Yeni Azərbaycan Partiyası (YAP) Yasamal rayon təşkilatı və "H.Cavid pr. 115 (AR ETN Ak. Həsən Əliyev ad. Coğrafiya İnstitutu)" ərazi partiya təşkilatının birgə təşkilatçılığı ilə Ulu Öndər Heydər Əliyevin Azərbaycanda siyasi hakimiyyətə gəlməsinin 57-ci ildönümü ilə əlaqədar "Müstəqilliyə Aparan Yol: Heydər Əliyev İrsi" adlı görüş keçirilib.
Crossmedia.az xəbər verir ki, ilk öncə Azərbaycan Respublikasının Dövlət Himni səsləndirilib. Sonra Ulu Öndər Heydər Əliyevin və Azərbaycanın suverenliyi uğrunda canlarından keçən şəhidlərin əziz xatirəsi bir dəqiqəlik sükutla yad edilib.
Sonra Ümummilli Lider Heydər Əliyevin 1969-cu il iyulun 14-də Azərbaycanda hakimiyyətə gəlişindən sonra ölkədə gerçəkləşən böyük intibah dövrünü, iqtisadi və mədəni sıçrayışı əks etdirən geniş sənədli videoçarx nümayiş olunub.
Görüşdə açılış nitqi ilə çıxış edən akademik Həsən Əliyev adına Coğrafiya İnstitutunun direktor müavini, direktor vəzifəsini müvəqqəti icra edən, fəlsəfə doktoru, dosent Zaur İmrani tədbir iştirakçılarını salamlayaraq, Ulu Öndər Heydər Əliyevin 1969-cu il iyulun 14-də siyasi hakimiyyətə gəlişi ilə Azərbaycanın sosial-iqtisadi, mədəni və elmi həyatında yeni bir inkişaf erasının əsasının qoyulduğunu bildirib. O vurğulayıb ki, Heydər Əliyevin uzaqgörən siyasəti sayəsində məhz həmin illərdə respublikada güclü sənaye və elmi potenasial formalaşdırılıb, milli intibahın bünövrəsi qoyulub. Zaur İmrani həmçinin xüsusi olaraq qeyd edib ki, Ümummilli Liderin coğrafiya elminə, təbiəti mühafizə məsələlərinə və elmi kadrlara göstərdiyi diqqət bu gün də İnstitutun fəaliyyət prioritetlərinin müəyyənləşdirilməsində dahi rəhbərin irsinin nə qədər böyük əhəmiyyət kəsb etdiyini göstərir.
Çıxış edən əsas məruzəçi YAP Yasamal rayon təşkilatının sədri Bəxtiyar Nəbiyev geniş məruzə ilə çıxış edərək Ulu Öndər Heydər Əliyevin zəngin və çoxşaxəli dövlətçilik irsindən, müasir müstəqil Azərbaycanın qurulması və möhkəmlənməsindəki tarixi xidmətlərindən etibarən ətraflı söhbət açıb. B.Nəbiyev bildirib ki, 1969-cu ildən başlayan böyük siyasi yol yalnız sovet Azərbaycanının yüksəlişini təmin etməyib, həm də gələcək müstəqil dövlətçiliyimizin möhkəm təməllərini yaradıb. 1993-cü ildə xalqın təkidli tələbi ilə hakimiyyətə qayıdan Ümummilli Lider ölkəni parçalanmaqdan, vətəndaş müharibəsindən və dərin siyasi-iqtisadi böhrandan xilas edərək Azərbaycanı regionun lider dövlətinə çevirib.
Məruzəçi vurğulayıb ki, Heydər Əliyev tərəfindən təməli qoyulan Yeni Azərbaycan Partiyası ötən illər ərzində böyük inkişaf yolu keçərək ölkəmizin ictimai-siyasi həyatında aparıcı və birləşdirici qüvvəyə çevrilib. Bu gün Ulu Öndərin siyasi xətti Prezident, YAP Sədri İlham Əliyev tərəfindən böyük uzaqgörənliklə və əzmkar fəaliyyətlə davam etdirilir. Məhz bu məqsədyönlü strategiyanın, güclü dövlət və müzəffər ordunun sayəsində Azərbaycan öz ərazi bütövlüyünü və suverenliyini tam bərpa edərək tarixi Zəfərə imza atıb. Bəxtiyar Nəbiyev əlavə edib ki, Heydər Əliyev ideyalarına sadəqət, Partiya ətrafında sıx birləşmək və bu irsi gələcək nəsillərə aşılamaq hər bir azərbaycanlının, xüsusən də elmi ziyalıların və gənclərin müqəddəs borcudur.
Daha sonra çıxış edən Coğrafiya İnstitutunun elmi işlər üzrə direktor müavini, şöbə müdiri Müseyib Yunusov Ümummilli Liderin elmə, təhsilə və elmi ziyalılara göstərdiyi diqqət və qayğıdan danışıb. M.Yunusov bildirib ki, Heydər Əliyev hər zaman coğrafiya elminin, ətraf mühitin mühafizəsinin və təbii ehtiyatlardan səmərəli istifadənin inkişafına böyük dəstək verib, bu gün də həmin xətt dövlət siyasətinin prioritet istiqamətlərindən birini təşkil edir.
Çıxışlardan sonra "H.Cavid pr. 115 (AR ETN Ak. Həsən Əliyev ad. Coğrafiya İnstitutu)" ərazi partiya təşkilatında sədr və sədr müavininin seçilməsi ilə bağlı təşkilati məsələlərə baxılıb.
Səsvermə keçirilib. Səsvermənin nəticələrinə əsasən, "H.Cavid pr. 115 (AR ETN Ak. Həsən Əliyev ad. Coğrafiya İnstitutu)" ərazi partiya təşkilatının sədri Zaur İmrani, sədr müavini isə Həmdulla Əliyev seçilib.
Tədbir Yeni Azərbaycan Partiyasının Himninin səsləndirilməsi ilə başa çatıb.
14:40 24.07.2026
Oxunuş sayı: 47
