İllərdir yanlış bilinən fakt: Dağlarda hava niyə daha soyuq olur?
Bir çoxları soyuq havanın aşağıya endiyini bildiyi halda, dağların zirvələrinin niyə daha soyuq olduğunu düşünür. Alimlər bunun səbəbini atmosferin quruluşu ilə izah edirlər.
Crossmedia.az xəbər verir ki, mütəxəssislərin sözlərinə görə, atmosfer əsasən Yer səthindən qızır. Yer Günəşdən aldığı enerjini havaya ötürür, istixana qazları isə bu istiliyin bir hissəsini atmosferdə saxlayır.
Lakin hündürlüyə qalxdıqca istixana qazlarının sıxlığı azalır. Nəticədə istilik kosmosa daha asan yayılır və temperatur aşağı düşür. Məhz buna görə dağların zirvələrində hava düzənliklərlə müqayisədə daha soyuq olur.
Bəs soyuq hava aşağı enmirmi?
Alimlər bildirirlər ki, soyuq hava həqiqətən də aşağıya doğru hərəkət edir. Ancaq bu proses eyni hündürlükdə yerləşən, ətrafındakı havadan daha soyuq və daha sıx hava kütlələrinin aşağı çökməsi şəklində baş verir.
Bununla belə, yüksək qatlarda yerləşən soyuq hava aşağıdakı isti havanı tamamilə sıxışdırıb yerini tuta bilmir. Çünki aşağı təbəqələrdəki hava daha yüksək təzyiqə və sıxlığa malikdir.
Beləliklə, dağlarda havanın daha soyuq olmasının əsas səbəbi soyuq havanın aşağı enməsi deyil, hündürlük artdıqca atmosferin istiliyi saxlamaq qabiliyyətinin zəifləməsidir.
Nigar Xəlilli
19:02 20.07.2026
Oxunuş sayı: 63
