Özbəkistan və Azərbaycanın IV Regionlararası Forumu özəl sektor üçün böyük əhəmiyyət kəsb edəcək
Azərbaycan və Özbəkistan arasında münasibətlər son illərdə strateji tərəfdaşlıq səviyyəsinə yüksələrək siyasi, iqtisadi, humanitar və mədəni sahələrdə dinamik inkişaf mərhələsinə qədəm qoyub. Dövlət başçıları arasında formalaşan qarşılıqlı etimad, Türk Dövlətləri Təşkilatı çərçivəsində əməkdaşlığın dərinləşməsi, nəqliyyat-logistika, investisiya, təhsil və mədəniyyət sahələrində həyata keçirilən birgə layihələr iki qardaş ölkə arasında əlaqələrin yeni məzmun qazanmasına səbəb olub. Xüsusilə son illərdə qarşılıqlı səfərlərin intensivləşməsi, ortaq investisiya layihələrinin reallaşdırılması və humanitar istiqamətdə atılan addımlar Bakı ilə Daşkənd arasında münasibətlərin davamlı inkişaf etdiyini göstərir. Bu əməkdaşlığın növbəti mühüm mərhələlərindən biri də Daşkənddə keçiriləcək Azərbaycan–Özbəkistan IV Regionlararası Forumudur. Forumun regionlar arasında iqtisadi əlaqələrin genişləndirilməsi, yeni investisiya imkanlarının müəyyənləşdirilməsi, biznes subyektləri arasında birbaşa əməkdaşlığın təşviqi və yerli idarəetmə orqanları arasında təcrübə mübadiləsinin gücləndirilməsi baxımından əhəmiyyətli platforma olacağı gözlənilir.
Mövzu ilə bağlı Crossmedia.az-a açıqlama verən Milli Məclisin deputatı Tənzilə Rüstəmxanlı qeyd edib ki, Azərbaycan və Özbəkistan arasında münasibətlər tarixən dostluq, qardaşlıq və qarşılıqlı hörmət prinsipləri üzərində qurulmuşdur: “Bu əlaqələrin güclənməsində mədəni və humanitar əməkdaşlıq xüsusi əhəmiyyət daşıyır. İki xalqı birləşdirən ortaq tarixi köklər, mədəni dəyərlər və mənəvi yaxınlıq bu sahədə əməkdaşlığın genişlənməsinə əlverişli şərait yaradır. Son illər hər iki ölkə rəhbərliyinin siyasi iradəsi və təşəbbüsləri mədəni-humanitar inteqrasiyanın daha yüksək səviyyəyə çatmasına səbəb olub. Özbəkistan və Azərbaycanın sayca dördüncü olan Regionlararası Forumunda iki qardaş ölkənin dövlət orqanlarının nümayəndələrini, investorlarını və işgüzar dairələrini bir araya gətirəcək. Tədbirdə Azərbaycanın aqrobiznes və qida sənayesi, tikinti və tikinti materialları istehsalı, maşınqayırma, informasiya texnologiyaları və rəqəmsal həllər, logistika, səhiyyə, energetika, sənaye istehsalı, eləcə də peşəkar və konsaltinq xidmətləri sahələrində fəaliyyət göstərən aparıcı şirkətlərinin iştirakı gözlənilir”.
T.Rüstəmxanlı əlavə edib ki, Forumda çox mühüm məsələlərə toxunulacaq: “Azərbaycan-Özbəkistanın dövlət qurumları və özəl sektoru təmsil edən nümayəndələrin iştirak edəcəyi forumda regionlararası əməkdaşlığının müxtəlif istiqamətlər üzrə genişləndirilməsi imkanları nəzərdən keçiriləcək. Forum iki ölkənin şirkətləri arasında işgüzar əlaqələrin genişləndirilməsinə, yeni tərəfdaşların tapılmasına və birgə layihələrin həyata keçirilməsinə töhfə vermək məqsədi daşıyır. Cənab prezident İlham Əliyevin uzaqgörən və uğurlu xarici siyasəti nəticəsində demək olar ki, bütün ölkələrlə, eləcə də Özbəkistanla münasibətlərimiz üçün əlavə potensial meydana çıxarmaqdadır. Əminəm ki, bundan sonra da Azərbaycan-Özbəkistan arasındakı əməkdaşlıq bütün sahələrdə artan temlə davam edəcək”.
Ayhan
20:00 11.07.2026
Oxunuş sayı: 64
