SOCAR İtaliya şirkəti ilə Anlaşma Memorandumu imzalayıb
Azərbaycan Dövlət Neft Şirkəti (SOCAR) və "Technip Energies Italy S.p.a." şirkəti arasında Anlaşma Memorandumu imzalanıb.
Crossmedia.az SOCAR-a istinadən xəbər verir ki, Anlaşma Memorandumu bu gün şirkətin prezidenti Rövşən Nəcəfin "Technip Energies Italy S.p.a."nın baş icraçı direktoru Karlo Korsi ilə görüşündə imzalanıb.
Görüşdə şirkətlər arasında ötən illər ərzində formalaşmış uğurlu tərəfdaşlıqdan məmnunluq ifadə olunub, potensial əməkdaşlıq istiqamətlərinin müəyyənləşdirilməsi ilə qarşılıqlı faydalı əlaqələrin genişləndirilməsinin önəmi vurğulanıb.
Söhbət zamanı neft-kimya sahəsində yüksək xammal çevikliyinə malik istehsal həllərinin tətbiqi, eləcə də məhsuldarlığın artırılması və enerji səmərəliliyinin yüksəldilməsi istiqamətlərində mümkün əməkdaşlıq məsələləri nəzərdən keçirilib.
Tərəflər SOCAR-ın xarici ölkələrdə icra etdiyi layihələrdə "Technip Energies Italy S.p.a." şirkətinin iştirakı imkanlarına, "yaşıl enerji" və dekarbonizasiya layihələri üzrə tərəfdaşlığa dair fikir mübadiləsi aparıblar.
Qeyd edək ki, sənəd "Petkim Master Plan" layihəsi çərçivəsində potensial əməkdaşlıq istiqamətlərinin müəyyən edilməsini nəzərdə tutur.
13:19 09.07.2026
Oxunuş sayı: 53
